ភ្នំពេញ៖ ក្លិបអ្នកកាសែតកម្ពុជា បានរៀបចំវេទិកាពិភាក្សាក្រោមប្រធានបទ "អត្ថប្រយោជន៍ ប.ស.ស សម្រាប់ប្រជាពលរដ្ឋ និងអ្នកសារព័ត៌មាន" ដោយអញ្ញើញអ្នកសារព័ត៌មានមកពីស្ថាប័នផ្សេងៗគ្នាចំនួនប្រមាណ ៥០ស្ថាប័ន ដើម្បីបានស្វែងយល់ឲ្យបានស៊ីជម្រៅបន្ថែមទៀត ពីអត្ថប្រយោជន៍នការចូលជាសមាជិក បេឡាជាតិសន្តិសុខសង្គម (ប.ស.ស)។

លោក ពុយ គា ប្រធានក្លិបអ្នកកាសែតកម្ពុជា នៅព្រឹកថ្ងៃទី២១ ខែមិថុនា ឆ្នាំ២០២៣នេះ បានមាន​ប្រសាសន៍ថា គោលបំណងចម្បងនៃកាបើកវេទិកានេះឡើង ដើម្បីឲ្យអ្នកបំពេញការងារ​ក្នុងវិស័យ​សារព័ត៌មាន បានស្វែងយល់កាន់តែស៊ីជម្រៅបន្ថែមទៀត ពីអត្ថប្រយោជន៍នការចូលជាសមាជិក ប.ស.ស ថា តើតួអង្គណាខ្លះដែលអាចចូលជាសមាជិក តួនាទីរបស់ ប.ស.ស ក្នុងការ​ការ ពារសិទ្ធិសមាជិក និងការបង់វិភាគទានជាដើម។

លោក សុក បូរ៉ា ប្រធាននាយកដ្ឋានតាវលិកសន្តិសុខសង្គម ​នៃបេឡាជាតិសន្តិសុខសង្គម បាន​បញ្ជាក់ថា ក្នុងស្ថានភាពដែលប្រទេសកម្ពុជាមានការរីកចម្រើនលើគ្រប់វិស័យ ការធានាផ្នែក​សន្តិសុខសង្គមមានសារៈសំខាន់ខ្លាំងណាស់ ដោយបានផ្តល់នូវការគាំទ្រចំពោះប្រជាជនកម្ពុជា​និយាយជារួម​ និងនិយាយដោយឡែកសម្រាប់កម្មករនិយោជិត ដែលបម្រើការងារនៅតាម​សហគ្រាស គ្រឹះស្ថាន ដោយផ្អែកលើទស្សនាទាន​នៃការចែករំលែក និងគោលការណ៍​សាមគ្គីធម៌ក្នុងសង្គមធានាបាននូវសន្តិសុខសង្គម គ្មានសមាជិកសង្គមណាម្នាក់ធ្លាក់​ទៅក្នុងហានិភ័យ​នៃភាពក្រីក្រ​ដោយមិនអាចងើបរួចបានឡើយ។

លោកបានបន្ថែមថា គោលនយោបាយសន្តិសុខសង្គម ក៏រួមចំណែកយ៉ាងសំខាន់ដល់គោល​នយោបាយ​កាត់បន្ថយភាពក្រីក្ររបស់​រាជរដ្ឋាភិបាលកម្ពុជា តាមរយៈគោលការណ៍​នៃការចែក​រំលែក​ប្រាក់​ចំណូល មានន័យថា អ្នកមានប្រាក់ចំណូលខ្ពស់ជួយដល់អ្នក​មានប្រាក់ចំណូលទាប អ្នកមានសុខភាពល្អ​ ជួយដល់អ្នកមានជំងឺ ​ជនពិការ ឬអ្នកដែលទទួលរងនូវគ្រោះថ្នាក់ផ្សេងៗ ជនមានវ័យក្មេងជួយដល់ជនចាស់ជរា​ ដែលការនេះធ្វើឲ្យមនុស្សក្នុងសង្គមទាំងមូល ទទួល​បាននូវភាពកក់ក្តៅក្នុងជីវភាពរស់នៅ​ ធានារក្សាបានស្ថិរភាព និងភាពសុខដុមរមនានៅក្នុងសង្គម៕

 អត្ថបទ ឈិត បូរ៉ាវី