ស៊ីរ៉ី ៖ លោក Mohammad Samir Mohammad និងលោក Ahmad Ghazal ដែលជាជនភៀសខ្លួនស៊ីរី នៅមានសោរ​ផ្ទះ​ដែល​ពួកគេជម្លៀសចេញ ជាប់ខ្លួនពួកគេដោយសង្ឃឹមថានៅថ្ងៃណាមួយ ពួកគេនឹងអាចវិលត្រឡប់​ទៅកាន់ផ្ទះរបស់​ពួកគេវិញ ។ 

លោក Mohammad និងលោក Ghazalបានជម្លៀសខ្លួន អំឡុងសង្រ្គាមស៊ីវិលស៊ីរី ហើយបច្ចុប្បន្នពួកគាត់រស់នៅក្នុងជំរំ Habbat al-Barakaនៅជិតព្រំដែនស៊ីរី-ទួរគី ស្ថិតក្នុងខេត្ត Northern Aleppo ។ 

បុរស ២នាក់ នៅតែមានក្តីស្រមៃវិលត្រឡប់ទៅកាន់ផ្ទះដែលពួកគេបានទុកចោល ហើយសង្ឃឹមថានៅថ្ងៃណាមួយ ពួកគាត់ នឹងអាចជួបជុំក្រុមគ្រួសារ និងមនុស្សជាទីស្រលាញ់របស់ពួកគាត់ម្តងទៀត នៅក្នុងភូមិរបស់ពួកគាត់ ។ 

លោក Ahmad Ghazal ដែលជាជនភៀសខ្លួនក្នុងប្រទេស និយាយថា ខ្ញុំបន់អស់ពីបេះដូងរបស់ខ្ញុំឲ្យបានវិល​ត្រឡប់ទៅ​កាន់ភូមិ និងផ្ទះរបស់ខ្ញុំវិញ ។ ពួកយើងទាំងអស់គ្នាឆ្អែតចិត្តខ្លាំងណាស់ ។ ពួកយើងមានផ្ទះធំ ខ្ញុំមានផ្ទះ ២-៣ខ្នងនៅក្នុង​ភូមិ ។ ខ្ញុំមានសួនច្បារ និងផ្ទះធំ ដើមអូលីវ និងដី ។ ពួកយើងធ្លាប់រស់នៅក្នុងជីវិតល្អប្រសើរ ហើយមកទីនេះ រស់នៅ​ក្រោម​សំពត់តង់ដែលធ្វើឲ្យពួកយើងអាម៉ាស់មុខខ្លាំងណាស់ ។ 

សូមបញ្ជាក់ថា ជំរំ Habbat al- Baraka មានជនភៀសខ្លួនជាង ៨០០គ្រួសារ ដែលរួមទាំងស្រ្តី និងកុមាររស់នៅ​ក្រោម​សំពត់​តង់រហែក និងស្ថានភាពរស់នៅលំបាក ។ ក្រុមគ្រួសារទាំងនេះ រងគ្រោះដោយសារកង្វះខាត​តម្រូវការមនុស្ស​ធម៌មូលដ្ឋាន និងសេវាកម្មសុខភាពអន់ថយ ។  

 ប្រជាពលរដ្ឋស៊ីរីជាង ៦លាននាក់ បានជម្លៀសខ្លួននៅក្នុងប្រទេសរបស់ពួកគេ ហើយជនភៀសខ្លួនស៊ីរី ៥,៥លាននាក់ កំពុងរស់នៅក្នុងប្រទេសជិតខាងទួរគី លីបង់ ហ្ស៊កដានី និងអ៊ីរ៉ាក់ ក៏ដូចជាអេហ្ស៊ីប ៕