កូរ៉េខាងត្បូង ៖ មនុស្សប្រហែល ១៧០នាក់ត្រូវបានជួយសង្រ្គោះ ឬជម្លៀសចេញពី​អគ្គិភ័យនៅ​ក្នុងបន្ទប់ក្រោម​ដី​សណ្ឋាគារ​ស្ថិតក្នុងទីក្រុង Busan ប្រទេសកូរ៉េខាងត្បូង ។ 

ទីភ្នាក់ងារព័ត៌មាន Yonhapnews របស់កូរ៉េខាងត្បូង រាយការណ៍ថា ភ្ញៀវសណ្ឋាគារមួយចំនួន ត្រូវបានជួយ​សង្រ្គោះដោយឧទ្ធម្ភាគចក្រ និងរថយន្តជណ្តើរ ហើយមនុស្ស ៣១នាក់ ត្រូវបានបញ្ជូនទៅកាន់មន្ទីរពេទ្យ ដោយសារតែពួកគេស្រូបចូលផ្សែង ។ 

យោងតាមការអះអាងរបស់ទីស្នាក់ការកណ្តាលអគ្គីភ័យ និងគ្រោះមហន្តរាយក្រុង Busan បានឲ្យដឹងថា អគ្គិភ័យនេះបានឆាបឆេះ​ឡើងនៅសណ្ឋាគារស្ថិតក្នុងសង្កាត់ Haeundae-gu ទីក្រុង Busan កាលពីវេលាម៉ោង ៩ និង ៣៤នាទីព្រឹក ម៉ោងក្នុងស្រុក ថ្ងៃអង្គារ ។ 

ក្រុមអាជ្ញាធរពន្លត់អគ្គិភ័យ និយាយថា អគ្គិភ័យត្រូវបានពន្លត់ទាំងស្រុង នៅវេលាម៉ោង ១ និង ៣០រសៀល ។ គ្មានសេចក្តីរាយការណ៍ពីករណីស្លាប់នោះទេ ៕