រុស្ស៊ី ៖ សកម្មជនប្រឆាំងសង្គ្រាមជនជាតិប្រេស៊ីលម្នាក់បាននិយាយថា ការផ្តល់អាវុធដល់រដ្ឋាភិបាល​អ៊ុយក្រែន​នឹងអូស​បន្លាយពេល ព្រមទាំងធ្វើឱ្យជម្លោះអ៊ុយក្រែន-រុស្ស៊ី កាន់តែរីកធំ ខណៈរដ្ឋជាសមាជិក​សម្ព័ន្ធយោធាណាតូ​ជាច្រើន​បានសន្យាគាំទ្រអ៊ុយក្រែនជាបន្តបន្ទាប់នៅក្នុងកិច្ចប្រជុំរដ្ឋមន្ត្រី​ការពារ​ជាតិនៃសម្ព័ន្ធ យោធានេះនៅប្រទេសបែលហ្ស៊ិក។ នៅក្នុងបទសម្ភាសន៍ជាមួយប្រព័ន្ធផ្សព្វផ្សាយ China Media Group (CMG) លោកស្រី Stephanie Weatherbee Brito អ្នកសម្របសម្រួលលេខាធិការដ្ឋានសម្រាប់សភាប្រជាជនអន្តរជាតិបាននិយាយថា ជម្លោះរវាងរុស្ស៊ីនិងអ៊ុយក្រែន​មិនត្រឹមតែជាជម្លោះរវាងប្រទេសទាំងពីរប៉ុណ្ណោះទេ ថែមទាំងជាលទ្ធផលនៃការពង្រីក​ខ្លួនទៅភាគខាងកើត​របស់អង្គការ​ណាតូផងដែរ។ ការផ្ទេរអាវុធទៅឲ្យអ៊ុយក្រែនអាចត្រឹមតែពន្យារពេលសង្គ្រាមប៉ុណ្ណោះ។

លោកស្រី Brito បានពន្យល់ថា «ខ្ញុំគិតថា ការបង្កើនគ្រឿងសព្វាវុធរបស់អ៊ុយក្រែន គឺគ្រាន់តែធ្វើឱ្យសង្រ្គាម​មានរយៈ​ពេលកាន់តែយូរប៉ុណ្ណោះ ដូច្នេះវាជាសោកនាដកម្ម។ ហើយអ្នកដែលបាត់បង់ច្រើនបំផុតពីគ្រឿងសព្វាវុធដែលបានកើនឡើងនេះ គឺប្រជាជនអ៊ុយក្រែន។ ខ្ញុំគិតថាមានឱកាសក្នុងរយៈពេលដប់ប្រាំបីខែកន្លងមកនេះ សម្រាប់កិច្ចចរចាសន្តិភាព ហើយនោះជាមធ្យោបាយ​ដែលគួរត្រូវបន្ត។ ប៉ុន្តែផ្ទុយទៅវិញ សហរដ្ឋអាមេរិកបានរុញច្រានយ៉ាងខ្លាំងនៅពីក្រោយហេតុការណ៍នៅអ៊ុយក្រែន មិនឱ្យឈានចូលទៅដល់កិច្ចចរចាសន្តិភាព ព្រោះសហរដ្ឋអាមេរិកមានចំណាប់អារម្មណ៍ក្នុងជម្លោះនេះ។ លោកស្រីបានកត់សម្គាល់ថា ជំនួសឱ្យការជំរុញឱ្យមានការចរចាសន្តិភាព សហរដ្ឋអាមេរិកបានចាត់ទុក​សង្រ្គាម​នេះថាជាការការពារលទ្ធិប្រជាធិបតេយ្យ ហើយទាមទារដោយពុំមានការទទួលខុសត្រូវឱ្យបណ្តាប្រទេសកំពុងអភិវឌ្ឍន៍ ដាក់ទណ្ឌកម្មលើប្រទេសរុស្ស៊ី។ យោងតាមរបាយការណ៍របស់ប្រព័ន្ធផ្សព្វផ្សាយបានឲ្យដឹងថា សម្ព័ន្ធយោធាណាតូ នឹងបង្កើតការិយាល័យទំនាក់ទំនងនៅទីក្រុងតូក្យូក្នុងឆ្នាំ ២០២៤ ហើយប្រើប្រាស់វាជាមជ្ឈមណ្ឌលសម្រាប់​កិច្ចសហប្រតិបត្តិការជាមួយប្រទេសកូរ៉េខាងត្បូង អូស្ត្រាលី នូវ៉ែលហ្សេឡង់ និងប្រទេសជប៉ុន។