កំពត ៖ គណៈកម្មាធិការជាតិរៀបចំការបោះឆ្នោត (គ.ជ.ប) នៅថ្ងៃទី១២ ខែឧសភាបានចេញសេចក្តីប្រកា សព័ត៌មានអំពីការ​ទទួលស្គាល់ជា​ផ្លូវការចំពោះគណបក្សនយោបាយចំនួន ៤ ដែលនឹងចូលរួមប្រកួត​ប្រជែងការបោះឆ្នោតជ្រើសរើសក្រុមប្រឹក្សាក្រុងបូកគោ ខេត្តកំពត។​

យោងតាមសេចក្តីប្រកាសព័ត៌មានរបស់ គ.ជ.ប បានឱ្យដឹងថា គណៈកម្មការរៀបចំការបោះឆ្នោតខេត្តកំពត បានសម្រេចទទួលស្គាល់ជាផ្លូវការនូវការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរ​ឈ្មោះរបស់គណបក្សហ៊្វុនស៊ិនប៉ិច។

សេចក្តីប្រកាសព័ត៌មាននេះ បានបញ្ជាក់ថា សម្រាប់ការបោះឆ្នោតលើកទី១ ដើម្បីជ្រើសរើសក្រុមប្រឹក្សាក្រុងបូកគោនៃខេត្តកំពត ក្នុងនោះ គណបក្សនយោបាយចំនួន៤ ដែលមានបេក្ខជនពេញសិទ្ធិ និងបម្រុងចូលរួមប្រកួតប្រជែងរួមមាន គណបក្សប្រជាជនកម្ពុជាមានចំនួន ២៨រូប, គណបក្សសញ្ជាតិកម្ពុជាមានចំនួន ២៨រូប, គណបក្សយុវជនកម្ពុជាមានចំនួន ២៦រូប និងគណបក្សហ្វ៊ុនស៊ិនប៉ិចមានចំនួន ២៦រូប។

សេចក្តីប្រកាសព័ត៌មាននេះ បានបន្តថា បន្ទាប់ពីសម្រេចទទួលស្គាល់ជាផ្លូវការនូវការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ គណៈកម្មការរៀបចំការបោះឆ្នោតខេត្ត នឹងរៀបចំការចាប់ឆ្នោតកំណត់លំដាប់លេខរៀងគណបក្សនយោបាយនៅលើសន្លឹកឆ្នោត ដើម្បីរៀបចំការបោះពុម្ពសន្លឹកឆ្នោត សម្រាប់ការបោះឆ្នោតជ្រើសរើសក្រុមប្រឹក្សាក្រុងបូកគោ ដែលនឹងប្រព្រឹត្តទៅនៅថ្ងៃទី២៥ ខែកក្កដា ឆ្នាំ២០២១។ អត្ថបទ ៖ ឌីន