ក្រុមអាជ្ញាធរឥណ្ឌា ចាប់ផ្តើមការស៊ើបអង្កេតរបស់ពួកគេ ក្រោយកាសែតក្នុងស្រុក បានរាយកាណ៍កាលពីថ្ងៃចន្ទថា មនុស្សយ៉ាងហោច ៥៤នាក់ បានស្លាប់ក្នុងស្រុកនៅរដ្ឋភាគខាងជើង Uttar Pradesh កាលពីរយៈពេលប៉ុន្មានថ្ងៃកន្លងមកនេះ ខណៈដែលមនុស្ស ៤៥នាក់ផ្សេងទៀត បានស្លាប់នៅរដ្ឋជិតខាង Bihar។  

នាយកដ្ឋានឧតុនិយមឥណ្ដា បានចេញសេចក្តីប្រកាសអាសន្នពណ៌ក្រហមកាលពីសប្តាហ៍មុន សម្រាប់រលកកម្តៅធ្ងន់ធ្ងរនៅតាមតំបន់មួយចំនួននៅក្នុងប្រទេស ដែលរួមទាំងរដ្ឋ Uttar Pradesh និងរដ្ឋ Bihar ។  

រដ្ឋាភិបាលឥណ្ឌានិយាយថា ពួកគេកំពុងស៊ើបអង្កេតលើមូលហេតុនាំឲ្យស្លាប់មនុស្ស ដែលបានកើតឡើងកាលពីរយៈពេល ១សប្តាហ៍មុន នៅរដ្ឋ Uttar Pradesh ប៉ុន្តែពួកគេពុំអាចបញ្ជាក់ពីចំនួនស្លាប់មនុស្សបាននោះទេ ។  

លោក Mayankeshwar Sharan Singh គឺជារដ្ឋមន្រ្តីក្រសួងសុខាភិបាលរដ្ឋ Uttar Pradesh និយាយថា ពុំមានរឿងរ៉ាវលម្អិតនោះទេពាក់ព័ន្ធនឹងករណីស្លាប់មនុស្សមកទល់នឹងពេលនេះ ។ លោកគិតថា ពួកយើងនឹងទទួលបានរឿងរ៉ាវលម្អិតនៅល្ងាចថ្ងៃនេះ ឬថ្ងៃស្អែក ។ 

 ខណៈពេលនោះដែរ ប្រជាពលរដ្ឋរស់នៅក្នុងរដ្ឋ Uttar Pradesh និងរដ្ឋ Bihar បន្តការងារប្រចាំថ្ងៃរបស់ពួកគេដូចទម្លាប់ បើទោះបីជាសីតុណ្ហភាពខ្ពស់យ៉ាងណាក្តី ។ ពួកគេភាគច្រើន យកក្រណាត់គ្របក្បាល និងមុខ ពេលដើរហើរខាងក្រៅ ៕