ប្រធានាធិបតីបារាំង លោក Emmanuel Macron និងក្រុមមេដឹកនាំពិភពលោក បានលើកឡើងថា ហិរញ្ញវត្ថុពីស្ថាប័នឯកជនត្រូវដើរតួនាទីយ៉ាងសំខាន់ ក្នុងការគាំទ្រដល់ការអភិវឌ្ឍសកលលោក និងកាត់បន្ថយភាពក្រីក្រ ដោយការផ្ដល់ប្រាក់កម្ចី ដែលមានការប្រាក់ទាប និងអាចបត់បែនបាន។

នៅក្នុងសារដែលទំនងជាធ្វើឲ្យអ្នកធ្វើយុទ្ធនាការប្រឆាំងភាពក្រីក្រជាច្រើនស្រងាកចិត្តនោះ ក្រុមមេដឹកនាំបាននិយាយនៅក្នុងលិខិតបើកចំហមួយថា ប្រាក់កម្ចី និងជំនួយរបស់រដ្ឋាភិបាល នឹងមិនគ្រប់គ្រាន់ ដើម្បីជំរុញការអភិវឌ្ឍ នៅទូទាំងប្រទេសដែលមានប្រាក់ចំណូលទាប និងមធ្យម ដែលរងគ្រោះដោយជំងឺរាតត្បាត Covid-19 បំណុលកើនឡើង និងការឡើងថ្លៃម្ហូបអាហារ និងថាមពលនោះឡើយ។

សារក្នុងលិខិតនោះ បានរៀបរាប់ថា ទឹកប្រាក់រាប់ពាន់លានផោន (រាប់ពាន់លានដុល្លារ) ដែលត្រូវការដើម្បីវិនិយោគលើបច្ចេកវិទ្យាបៃតង និងដោះស្រាយវិបត្តិអាកាសធាតុ ក៏នឹងពឹងផ្អែកលើ«ប្រភពហិរញ្ញវត្ថុប្រកបដោយភាពច្នៃប្រឌិត និងនិរន្តរភាព ដូចជាការទិញបំណុលត្រឡប់» ដែលអនុញ្ញាតឲ្យរដ្ឋាភិបាលកាត់បន្ថយជាប្រវត្តិសាស្ត្រនូវការទូទាត់ការប្រាក់ខ្ពស់។

មេដឹកនាំពិភពលោកនឹងជួបប្រជុំគ្នា នៅថ្ងៃព្រហស្បតិ៍ (ទី២២ ខែមិថុនា) នៅទីក្រុងប៉ារីស ដើម្បីពិភាក្សាស្ដីអំពីហិរញ្ញវត្ថុអាកាសធាតុ ការរីកចម្រើនដែលមិនប៉ះពាល់ដល់បរិស្ថាន វិបត្តិបំណុល និងស្ដីអំពីរបៀបទាញយកប្រភពវិនិយោគពីវិស័យឯកជន។

សារលិខិតដែលត្រូវបានចេញផ្សាយដោយស្ថាប័នប្រព័ន្ធផ្សព្វផ្សាយដែលមានមូលដ្ឋាននៅសហរដ្ឋអាមេរិក Project Syndicate គឺជាផ្នែកមួយនៃកិច្ចខិតខំប្រឹងប្រែងរបស់លោក Macron ដើម្បីដោះស្រាយនូវកង្វល់ដែលកំពុងកើនឡើងអំពីប្រព័ន្ធហិរញ្ញវត្ថុអភិវឌ្ឍបច្ចុប្បន្ន រួមទាំងជំនួយបរទេសពីប្រទេសអ្នកមានផងដែរ៕