អគ្គលេខាធិការអង្គការសហប្រជាជាតិ លោក Antonio Guterres នៅថ្ងៃពុធ (ទី២១ ខែមិថុនា) នេះ បានសម្ដែងការសោកស្ដាយនូវអ្វីដែលលោកហៅថា ការខ្វះខាតថវិការ៉ាំរ៉ៃ សម្រាប់ជំនួយ នៅទូទាំងពិភពលោកបើទោះបីជាមានការកើនឡើងនូវតម្រូវការជំនួយមនុស្សធម៌ក៏ដោយ។

លោក Guterres បាននិយាយថា មានតែ ២០ភាគរយប៉ុណ្ណោះនៃមូលនិធិដែលត្រូវការ ក្រោមការអំពាវនាវជំនួយមនុស្សធម៌សកលរបស់អង្គការសហប្រជាជាតិ ឬ UN ត្រូវបានទទួលតែត្រឹមពាក់កណ្តាលទីរហូតដល់ឆ្នាំ២០២៣។

កាលពីថ្ងៃចន្ទ (ទី១៩ ខែមិថុនា) ម្ចាស់ជំនួយអន្តរជាតិបានសន្យាផ្តល់ជំនួយជិត ១,៥ពាន់លានដុល្លារដល់ប្រទេសស៊ូដង់ ដែលរងគ្រោះដោយវិបត្តិមនុស្សធម៌ធ្ងន់ធ្ងរ រហូតបានជំរុញឲ្យមនុស្សប្រហែល ២,២លាននាក់ ចាកចេញពីគេហដ្ឋានរបស់ពួកគេ។

នៅមុនសន្និសីទនោះ ការអំពាវនាវរបស់អង្គការសហប្រជាជាតិ ឬUN រកទឹកប្រាក់ចំនួន ២,៥៧ពាន់លានដុល្លារ សម្រាប់ជំនួយមនុស្សធម៌ នៅប្រទេសស៊ូដង់ នាឆ្នាំនេះ គឺប្រហែល ១៧ភាគរយ ដែលត្រូវបានផ្តល់មូលនិធិ ហើយការអំពាវនាវរកទឹកប្រាក់ជិត ៥០០លានដុល្លារ សម្រាប់ជនភៀសខ្លួន ដែលរត់គេចចេញពីប្រទេស ត្រូវបានផ្តល់មូលនិធិត្រឹមតែ ១៥ភាគរយប៉ុណ្ណោះ៕