ភ្នំពេញ ៖ នៅថ្ងៃទី២១ ខែមិថុនានេះ ឯកឧត្តម កិត្តិនីតិកោសលបណ្ឌិត ទេសរដ្ឋមន្ត្រី ឱម យិនទៀង ប្រធានអង្គភាពប្រឆាំងអំពើពុករលួយ បានទទួលពិភាក្សាការងារជាមួយឯកឧត្តម ឯកឧត្តម KHAMPHANH PHOMMATHATH ប្រធានអាជ្ញាធរអធិការកិច្ចរដ្ឋរបស់ប្រទេសឡាវ ដើម្បីពង្រីងកិច្ចសហប្រតិបត្តិការប្រយុទ្ធប្រឆាំងអំពើពុករលួយ ទ្វេរភាគី និងក្នុងក្របខ័ណ្ឌសមាជិកអង្គភាពប្រឆាំងអំពើពុករលួយអាស៊ាន ASEAN-PAC(ផេក)។

ឯកឧត្តម ទេសរដ្ឋមន្ត្រី ឱម យិនទៀង បានឲ្យដឹងថា នៅក្នុងដំណើរទស្សនាកិច្ចប្រតិភូជាន់ខ្ពស់ឡាវ ៦រូប ដឹកនាំដោយឯកឧត្តម KHAMPHANH PHOMMATHATH គឺមានគោលបំណងសំខាន់៖ ទី១. បើកជំនួបកិច្ចពិភាក្សាការងារទ្វេភាគីកម្ពុជា ឡាវ ដើម្បីផ្លាស់ប្ដូរ ចែករំលែកបទពិសោធន៍ទៅវិញទៅមក លើការងារប្រឆាំងអំពើពុករលួយរបស់ភាគីនីមួយៗ។ ទី២. បន្តចុះអនុស្សារណៈនៃការយោគយល់គ្នា (MoU) រវាងទ្វេរភាគីកម្ពុជា ឡាវ សម្រាប់ការអនុវត្តការងារ៥ឆ្នាំបន្តទៀត ២០២៣-២០២៨ ក្នុងគោលបំណង លើកស្ទួយ និងបង្កើនកិច្ចសហប្រតិបត្តិការក្នុងការប្រយុទ្ធប្រឆាំងអំពើពុករលួយ តាមរយៈការផ្លាស់ប្តូរដំណើរទស្សនកិច្ចផ្លូវការរវាងស្ថាប័នទាំងពីរ និងការផ្លាស់ប្តូរព័ត៌មាន ចំណេះដឹង និងបទពិសោធន៍ លើមូលដ្ឋាន នៃសមភាពការគោរពគ្នា និងផលប្រយោជន៍ទៅវិញទៅមក។

ឯកឧត្តម ទេសរដ្ឋមន្ត្រី ឱម យិនទៀង បន្តថា ប្រទេសឡាវ បានចូលជាសមាជិក SEA-PAC ដែលបច្ចុប្បន្នបានប្តូរឈ្មោះហៅថា អង្គភាពប្រឆាំងអំពើពុករលួយអាស៊ាន (ASEAN-PAC) នៅឆ្នាំ២០១០ ពោលគឺ អំឡុងពេល អង្គភាពប្រឆាំងអំពើពុករលួយកម្ពុជា ធ្វើជាម្ចាស់ផ្ទះ និងធ្វើជាប្រធានកិច្ចប្រជុំថ្នាក់ដឹកនាំ SEA-PAC លើកទី៦ នៅខេត្តសៀមរាប ខណៈនៅក្នុងឆ្នាំ២០២៣នេះ ប្រទេសឡាវនឹងទទួលធ្វើជាម្ចាស់ផ្ទះ និងជាប្រធានបន្តវេនរបស់អាស៊ាន-ផេក បន្ទាប់ពី កម្ពុជា ដែលរៀបចំនៅឆ្នាំ២០២២កន្លងមកនេះ ។

សូមបញ្ជាក់ថា ASEAN-PAC គឺជាអង្គភាពភ្ជាប់ខ្លួនរបស់អាស៊ាន ដែលបច្ចុប្បន្នមានសមាជិកមកពីស្ថាប័នប្រឆាំងអំពើពុករលួយរបស់បណ្តាប្រទេសអាស៊ានទាំង ១០ ខណៈ នៅក្នុងខែវិច្ឆិកា ឆ្នាំ២០២២ ប្រទេស ទីម័រឡេស្ត បានទទួលឋានៈជាប្រទេសសង្កេតការណ៍អាស៊ាន ៕ អត្ថបទ ÷ ស៊ុម សុខជា