បាល់ទាត់៖ លោក សុក វាសនា គ្រូបង្វឹកក្រុមអាស៊ីអឺរ៉ុបបានបញ្ជាក់ថា ក្រុមខ្លួននឹងលេងដោយទំនុកចិត្តជាមួយក្រុមភ្ញៀវបឹងកេតនាថ្ងៃអាទិត្យនេះ ខណៈលោក គីម ភក្ដី គ្រូបង្វឹកក្រុមនាគខៀវបឹងកេតបានប្ដេជ្ញាយកឈ្នះឲ្យខានតែបាន ដើម្បីបន្ដឱកាសការពារតំណែងជើងឯករបស់ខ្លួនក្នុងរដូវកាលឆ្នាំ២០២១ នេះ។
លោក សុក វាសនា បាននិយាយថា ការត្រឡប់មកវិញនៃលីគកំពូលកម្ពុជាគឺជារឿងសប្បាយចិត្ត តែលោកមានកង្វល់ខ្លះក្រោយបញ្ចប់ការបិទខ្ទប់ ដោយក្រុមខ្លួនពុំមានពេលគ្រប់គ្រាន់ ដើម្បីប្រមូលកម្លាំង និងបច្ចេកទេសនោះទេ។ តែយ៉ាងណាអាស៊ីអឺរ៉ុបនឹងព្យាយាមលេងអស់ពីសមត្ថភាព ក្នុងការប្រកួតដ៏សំខាន់នេះ ដ្បិតពួកគេមិនមានសម្ពាធដូចក្រុមភ្ញៀវឡើយ។ ដោយឡែកលោក គីម ភក្ដី បានបាត់ទុកជាសម្ពាធមួយសម្រាប់ក្រុមខ្លួន ក្រោយបរាជ័យ ២ប្រកួតផ្ទួនៗកាលពីដើមរដូវកាល តែយ៉ាងណាលោកប្ដេជ្ញានឹងដណ្ដើមជ័យជម្នះ សម្រាប់ការប្រកួតបន្ដបន្ទាប់ ពិសេសការប្រកួតជាមួយក្រុមអាស៊ីអឺរ៉ុប ដើម្បីធានាថា ក្រុមខ្លួននៅតែជាបេក្ខភាពប្រកួតប្រជែងយកពានលីគកំពូលកម្ពុជាឆ្នាំនេះ ទោះបីជាមានឧបសគ្គយ៉ាងណាក៏ដោយ។
ចំពោះការជួបក្រុមម្ចាស់ផ្ទះអាស៊ីអឺរ៉ុបវិញ ម្ចាស់ពានគ្រូបង្វឹកឆ្នើមឆ្នាំ២០២០ បន្ដថា អាស៊ីអឺរ៉ុប មានកីឡាករបរទេសតំបន់ប្រយុទ្ធល្អមានភាពលេចធ្លោ ដែលធ្វើឲ្យមានការប្រែប្រួលការលេងមួយចំនួន តែមិនមែនជាឧបសគ្គសម្រាប់ក្រុមខ្លួនក្នុងការប្រកួតនេះឡើយ។ ដូច្នេះបឹងកេតនឹងប្រឹងប្រែង ដើម្បីយកឈ្នះការប្រកួតនេះឲ្យទាល់តែបាន ទោះស្ថិតក្នុងស្ថានភាពពិបាក ឬស្រួលបែបណាក៏ដោយ។ គួរដឹងថា ជំនួបរវាងក្រុមអាស៊ីអឺរ៉ុប និងក្រុមបឹងកេតនឹងប្រព្រឹត្តទៅនាវេលាម៉ោង ៣៖៣០នាទីរសៀលថ្ងៃទី១៦ ខែឧសភា ឆ្នាំ២០២១ នេះនៅកីឡដ្ឋាន AEU Sport Park ដែលជាជំនួបបង្គ្រប់សប្ដាហ៍ទី២ ហើយការប្រកួតនេះនឹងមានផ្សាយផ្ទាល់លើកញ្ចក់ទូរទស្សន៍ BTV-News ផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
