មនុស្សចំនួន ៣៧នាក់បានរងរបួស ក្នុងនោះ ៤នាក់ មានសភាពធ្ងន់ធ្ងរ បន្ទាប់ពីមានការផ្ទុះដ៏ធំមួយនៅកណ្តាលទីក្រុងប៉ារីស ប្រទេសបារាំង។ ការផ្ទុះនេះបានកើតឡើងនៅក្នុងអគារមួយដែលមានសាលាបង្រៀនគូរប្លង់ និងទីស្នាក់ការកណ្តាលនៃប្រព័ន្ធអប់រំកាតូលិកនៅវិថី Rue Saint-Jacques (រុយ សាំងហ្សាក់) ក្នុងសង្កាត់ទី៥ នៃរដ្ឋធានីបារាំង។

បុគ្គលិកសង្គ្រោះបន្ទាន់ កំពុងស្វែងរកតាមបំណែកបែកបាក់របស់អគារ ដោយគេគិតថា យ៉ាងហោចណាស់មានមនុស្ស ពីរនាក់ កំពុងបាត់ខ្លួន។ យោងតាមសាក្សីបានឲ្យដឹងថា ពួកគេបានធុំក្លិនហ្គាសឆួលយ៉ាងខ្លាំង នៅមុនមានការផ្ទុះនេះ។

រដ្ឋអាជ្ញាទីក្រុងប៉ារីស លោក Laure Beccuau (ឡ បិកគ្យូ) បាននិយាយបន្ទាប់ពីបានទៅដល់កន្លែងកើតហេតុថា ការត្រួតពិនិត្យវីដេអូកាមេរ៉ាជាដំបូង បានបង្ហាញថា ការផ្ទុះបានកើតឡើងនៅក្នុងអគារ ដែលនៅជាប់នឹងព្រះវិហារ Val de Grâce ( វ៉ាល ដឺក្រាស)។

តែទោះយ៉ាងណាក្ដី អាជ្ញាធរបានប្រាប់ថា មូលហេតុនៃការផ្ទុះនេះ នៅមិនទាន់កំណត់បាននោះទេ។ មេនគរបាលក្រុងប៉ារីស លោក Laurent Nunez ( ឡូរ៉ង់ នូណេ) បាននិយាយថា អគារដំបូងឡើយត្រូវបានភ្លើងឆាបឆេះ ប៉ុន្តែក្រោយមក អគ្គិភ័យត្រូវបានគ្រប់គ្រង។

តំបន់នោះត្រូវបានបិទ ហើយរដ្ឋមន្ត្រីក្រសួងមហាផ្ទៃ លោក Gérald Darmanin ( ហ្សេរ៉ាល់ ដាម៉ាណាំង) បានទៅដល់កន្លែងកើតហេតុហើយ។

លោករដ្ឋមន្ត្រីបាននិយាយថា សុនខហិតក្លិន បានកំណត់កន្លែងដែលជនរងគ្រោះបន្ថែមទៀតអាចត្រូវបានរកឃើញ នៅក្រោមគំនរបាក់បែក។

តំបន់ដែលមានការផ្ទុះកើតឡើង លាតសន្ធឹងទៅទិសខាងត្បូងពី Latin Quarter (ឡាតាំង កាតេ) ក្នុងតំបន់ រីហ្វហ្គោសឬ Left Bank របស់ទីក្រុងប៉ារីស ដែលជាកន្លែងពេញនិយមរបស់អ្នកទេសចរ និងដែលត្រូវបានគេស្គាល់យ៉ាងច្បាស់ដោយសារសម្បូរសិស្សនិស្សិតច្រើន៕