ផ្លូវនានានៃទីក្រុង ហ្គូរូក្រាម (Gurugram ) ភាគខាងជើងរបស់ប្រទេសឥណ្ឌា ត្រូវបានទឹកជន់លិច កាលពីថ្ងៃពុធទី២១មិថុនា បន្ទាប់ពីរងការធ្លាក់ភ្លៀងដំបូងនៃ រដូវមូសុង ដែលបណ្ដាលឲ្យអាក់ខានដល់ការធ្វើចរាចរណ៍ដ៏សំខាន់។

ប្រជាពលរដ្ឋបានរិះគន់ក្រុមអាជ្ញាធរក្នុងស្រុករបស់ខ្លួនចំពោះការមិនអើពើចាត់វិធានការទប់ស្កាត់ទឹកជំនន់។

ប្រជាពលរដ្ឋជាច្រើន ដើរលុយទឹក តាមដងផ្លូវនានាដែលត្រូវទឹកជនន់លិច នៅក្នុងទីក្រុងនេះ ដែលស្ថិតនៅចម្ងាយប្រហែល៣០ គីឡូម៉ែត្រពីភាគនិរតីនៃរដ្ឋធានី New Delhi។

ការិយាល័យអាកាសធាតុឥណ្ឌា បានព្យាករថា នឹងមានភ្លៀងធ្លាក់ថែមទៀតក្នុងតំបន់នេះ នៅសប្ដាហ៍នេះ។

ប្រទេសឥណ្ឌា ដែលមានប្រជាជនសរុបចំនួន ១,៣ ពាន់លាននាក់ ពឹងអាស្រ័យលើទឹកភ្លៀង ដើម្បីជួយដល់កសិកម្មរបស់ប្រជាពលរដ្ឋ ភាគច្រើននៃពួកគេរស់នៅ និងពឹងផ្អែក លើកសិកម្ម ប៉ុន្តែ ពេលមានភ្លៀងធ្លាក់ច្រើនលើសកម្រិត អាចបង្កឲ្យមានទឹកជំនន់ និងការជន់លិច ពិសេសដោយសារប្រព័ន្ធលូនៅទន់ខ្សោយ៕