ប្រទេសចិន បានហៅការអត្ថាធិប្បាយរបស់លោកប្រធានាធិបតីអាមេរិក Joe Bidenដែលហៅមេដឹកនាំចិន លោក Xi Jinping ថាជាមេដឹកនាំផ្ដាច់ការ ជាសម្ដីគ្មានហេតុផល និងគ្មានទំនួលខុសត្រូវទាល់តែសោះ។

ការប៉ះទង្គិចគ្នាដោយពាក្យសម្ដីថ្មីនេះ បានកើតឡើងត្រឹមជាង១ថ្ងៃ បន្ទាប់ពីប្រមុខការទូតអាមេរិក លោក Antony Blinken បានបញ្ចប់ដំណើរទស្សនកិច្ចទៅកាន់ទីក្រុងប៉េកាំង ដែលបានព្យាយាមពុះបំបែករនាំងឧបសគ្គនៃទំនាក់ទំនងរវាងប្រទេសមហាអំណាចទាំង២ ដែលបានធ្លាក់ចុះដុនដាបជាប្រវត្តិសាស្ត្រ។

អ្នកនាំពាក្យក្រសួងការបរទេសចិន លោកស្រី Mao Ning បាននិយាយថា សម្ដីរបស់លោក នៅព្រឹត្តិការណ៍រៃអង្គាសមូលនិធិក្នុងរដ្ឋ California ផ្ទុយពីការពិតទាំងស្រុង និងរំលោភលើ​ពិធិការផ្នែក​ការ​ទូត​យ៉ាងធ្ងន់ធ្ងរ និងរំលោភយ៉ាងធ្ងន់ធ្ងរ​លើសេចក្ដីថ្លៃថ្នូរខាង​នយោបាយរបស់ប្រទេសចិន។

លោកស្រី Mao បាននិយាយនៅសន្និសីទសារព័ត៌មានប្រចាំថ្ងៃមួយថា វាជាការបង្ករឿងខាង​នយោបាយបែបប្រមាថ ។ ប្រទេសចិន បង្ហាញការមិនពេញចិត្តជាខ្លាំង និងប្រឆាំងដាច់ខាត។

ការនាំពាក្យរូបនេះ បន្ថែមថា ការប្រើសម្ដីបែបនេះរបស់មេដឹកនាំអាមេរិកគឺជាទង្វើមិនសមហេតុផល និងគ្មានទំនួលខុសត្រូវទាល់តែសោះ។

គួររម្លឹកថា នៅព្រឹត្តិការណ៍រៃអង្គាសមូលនិធិកាលពីយប់ថ្ងៃអង្គារ នៅសហរដ្ឋអាមេរិក ​លោក Biden បាននិយាយថា លោក Xi បានរងភាពអាម៉ាស់ រឿងភាពតានតឹងថ្មីៗ​ទាក់ទឹងបាឡុងដែល​សង្ស័យថា​ជាបាឡុងចារកម្មរបស់ចិន ​ ដែលត្រូវបានបាញ់ទម្លាក់ដោយ​ អង្គភាពកងម្លាំងទ័ពអាកាស នៅតំបន់ឆ្នេរសមុទ្រភាគខាងកើត៕