ភ្នំពេញ៖ ក្រុមប្រឹក្សាធម្មនុញ្ញ នៃព្រះរាជាណាចក្រកម្ពុជា បានរៀបចំធ្វើបទបង្ហាញស្តីពី ការពិនិត្យ​ធម្មនុញ្ញភាព នៃច្បាប់ និងការដោះស្រាយបណ្ដឹង ក្រោយពេលបោះឆ្នោតជាសកល​ជ្រើសរើស​តាំងតំណាងរាស្ត្រ ដល់សាស្ត្រាចារ្យ និងសិស្សនិស្សិត ​នៃសាកលវិទ្យាល័យកម្ពុជា ចំនួនជាង៦០នាក់ ។

ក្នុងកម្មវិធីធ្វើបទបង្ហាញនៅថ្ងៃទី២២ ខែមិថុនា ឆ្នាំ២០២៣ នាក្រុមប្រឹក្សាធម្មនុញ្ញ ឯកឧត្តម តាំង រតនា អគ្គលេខាធិការ នៃក្រុមប្រឹក្សាធម្មនុញ្ញ បានធ្វើបទបង្ហាញពីប្រវត្តិ នៃរដ្ឋធម្មនុញ្ញរបស់ព្រះរាជាណាចក្រកម្ពុជា និងតួនាទីសំខាន់​ៗ ខណៈក្រុមប្រឹក្សាធម្មនុញ្ញ មានសមត្ថកិច្ចធានាការពារ ការគោរពរដ្ឋធម្មនុញ្ញ បកស្រាយរដ្ឋធម្មនុញ្ញ និងច្បាប់ដែលរដ្ឋសភាបានអនុម័ត និងព្រឹទ្ធសភា បានពិនិត្យចប់សព្វគ្រប់ហើយ ។

ឯកឧត្តមបន្តថា ក្រុមប្រឹក្សាធម្មនុញ្ញក៏មានសិទ្ធិផងដែរ ក្នុងពិនិត្យ និងសម្រេចអំពីករណីវិវាទកម្ម ទាក់ទងនឹងការបោះឆ្នោតជ្រើសតាំងតំណាងរាស្ត្រ និងការបោះឆ្នោតជ្រើសតាំងនូវ​សមាជិក​ព្រឹទ្ធសភា ហើយប្រជាពលរដ្ឋមានសិទ្ធិប្ដឹងអំពីធម្មនុញ្ញភាព​ នៃច្បាប់បាន តាមរយៈតំណាងរាស្ត្រ ឬប្រធានរដ្ឋសភា ​ឬសមាជិកព្រឹទ្ធសភា ឬប្រធានព្រឹទ្ធសភាដូចមានចែងក្នុងវាក្យខ័ណ្ឌខាងលើ ។

គួរបញ្ជាក់ថា ផ្អែកលើផែនការអភិវឌ្ឍកម្មវិធីសិក្សា មហាវិទ្យាល័យច្បាប់ នៃសាកលវិទ្យាល័យកម្ពុជា ក្នុងបំណងផ្ដល់ឱកាសជូននិស្សិត ឲ្យបានធ្វើទស្សនកិច្ចសិក្សា ដោយផ្ទាល់នៅតាមបណ្តាក្រសួង ស្ថាប័នរដ្ឋ និងឯកជននានា ដើម្បីស្វែងយល់ រៀនសូត្រ និងទទួលបាននូវចំណេះដឹងបន្ថែមពាក់ព័ន្ធ​នឹងវិស័យច្បាប់ នៅក្នុងវគ្គសិក្សាទី២ នៃឆ្នាំសិក្សា២០២២-២០២៣នេះ ។ មហាវិទ្យាល័យច្បាប់ បានរៀបចំកម្មវិធីសិក្សាបន្ថែម ដោយតម្រូវឱ្យមានទស្សនកិច្ចសិក្សានៅក្រុមប្រឹក្សាធម្មនុញ្ញ ដែលដឹកនាំដោយ អ្នកស្រី ព្រំម កល្យាណ សាស្ត្រាចារ្យ នៃមហាវិទ្យាល័យច្បាប់ ៕ អត្ថបទ និងរូប បាន សុខរិទ្ធិ