ភ្នំពេញ៖ គណៈកម្មាធិការជាតិរៀបចំការបោះឆ្នោត (គ.ជ.ប) នៅថ្ងៃទី ២២ ខែមិថុនា ឆ្នាំ២០២៣នេះ បានធ្វើកិច្ចប្រជុំផ្សព្វផ្សាយជាមួយភាគីពាក់ព័ន្ធស្ដីពីការស្នើសុំ និងចេញឯកសារបញ្ជាក់អត្តសញ្ញាណ​បម្រើ​ឱ្យការបោះឆ្នោត ​និងការបិទបញ្ជីឈ្មោះទីតាំងការិយាល័យបោះឆ្នោត ​និងបញ្ជីបោះឆ្នោតនៅ គណៈកម្មាឃុំ ​សង្កាត់រៀបចំការបោះឆ្នោត (គឃ.សប) សម្រាប់ការបោះឆ្នោតជ្រើសតាំង​តំណាងរាស្រ្ដ​នីតិកាលទី៧ ឆ្នាំ២០២៣។

ឯកឧត្តម ហ៊ីង ធីឫទ្ធិ សមាជិក គ.ជ.ប និងជាប្រធានដឹកនាំកិច្ចប្រជុំ បានថ្លែងថា ថ្ងៃនេះ គ.ជ.ប រៀបចំកិច្ចប្រជុំផ្សព្វផ្សាយជាមួយភាគីពាក់ព័ន្ធ​ផ្ដោតសំខាន់​លើ ការស្នើសុំ និងការចេញឯកសារ​បញ្ជាក់​អត្តសញ្ញាណបម្រើឱ្យការបោះឆ្នោតតាមឃុំ សង្កាត់ ការបិទផ្សាយបញ្ជីឈ្មោះទីតាំង​ការិយា​ល័យបោះឆ្នោត និងបញ្ជីបោះឆ្នោតនៅ ​គណៈកម្មាឃុំ សង្កាត់រៀបចំការបោះឆ្នោត។

ឯកឧត្ដមបន្តថា បច្ចុប្បន្ន គ.ជ.ប កំពុងបន្តធ្វើការងារយ៉ាង​មមាញឹក​ក្នុង​ការចែកបណ្ណព័ត៌មាន​បោះឆ្នោត​ដល់ប្រជាពលរដ្ឋតាមរាជធានី-ខេត្ត ​ដើម្បីផ្ដល់ព័ត៌មានអំពីការបោះឆ្នោត បញ្ជាក់អំពីកាល​បិច្ឆេទ ​និងការយកឯកសារពាក់ព័ន្ធ​សម្រាប់ត្រៀមក្នុងការបោះឆ្នោត​ជ្រើសតាំងតំណាងរាស្រ្ត​នាពេលខាងមុខនេះ។

សូមជម្រាបថា ដើម្បីផ្ដល់ភាពងាយស្រួល និងសម្រួលដល់ដំណើការបោះឆ្នោតជ្រើសតាំងតំណាង​រាស្រ្ដនីតិកាលទី៧នេះ រាជរដ្ឋាភិបាល ​កាលពីថ្ងៃទី ២១ ខែមិថុនានេះបានចេញអនុក្រឹត្យស្តីពីការបន្ត​សុពលភាព​ដល់សញ្ញាណសញ្ជាតិខ្មែរ​គំរូថ្មីដែលអស់សុពលភាពប្រើប្រាស់ក្នុងឆ្នាំ ​២០២២ និង​ឆ្នាំ២០២៣ អាចប្រើប្រាស់ជាឯកសារសម្រាប់បោះឆ្នោតជ្រើសតាំងតំណាងរាស្ត្រនីតិកាលទី៧ នាថ្ងៃ២៣ កក្កដាខាងមុខនេះ៕អត្ថបទ៖វ៉ន ដារ៉ា