ហ្គាហ្សា៖ ការផ្ទុះជាបន្តបន្ទាប់បានបំភ្លឺពេញផ្ទៃមេឃនាពេលរាត្រី នៅក្នុងតំបន់ហ្គាហ្សាភាគខាងជើងកាលពីក្បាលព្រលប់ថ្ងៃពុធ ខណៈការប៉ះទង្គិចគ្នារវាងអ៊ីស្រាអែល និងក្រុមសកម្មប្រយុទ្ធប៉ាឡេស្ទីនកក្រើកកាន់តែខ្លាំងឡើង។ ក្រុមអាជ្ញាធរនៅក្នុងតំបន់ហ្គាហ្សាបាននិយាយថា មនុស្សចំនួន ៦៥នាក់បានស្លាប់ រួមទាំងក្រុមមេបញ្ជាការហាម៉ាស់មួយចំនួនត្រូវបានសម្លាប់ ចាប់តាំងពីការប៉ះទង្គិចគ្នាបានផ្ទុះឡើងនៅដើមសប្ដាហ៍នេះ។
មេបញ្ជាការជាន់ខ្ពស់របស់ក្រុមសកម្មប្រយុទ្ធហាម៉ាស់ ក៏ស្ថិតក្នុងចំណោមអ្នកស្លាប់ទាំងនោះដែរ ដោយការវាយប្រហារតាមអាកាសជាបន្តបន្ទាប់ របស់អ៊ីស្រាអែលនៅក្នុងតំបន់ហ្គាហ្សា ខណៈដែលអំពើហិង្សារវាងក្រុមហាម៉ាស់ និងកងកម្លាំងអ៊ីស្រាអែលនៅតែបន្ត។ ក្រុមហាម៉ាស់បានបញ្ជាក់ពីការស្លាប់ របស់មេបញ្ជាការជាន់ខ្ពស់របស់ខ្លួនទៅកាន់សារព័ត៌មាន Reuters និងនិយាយថា មេដឹកនាំមួយចំនួន និងក្រុមយុទ្ធជនបានស្លាប់។ ក្រុមហាម៉ាស់បានប្រាប់សារព័ត៌មាន Reuters ថា ក្រុមមេដឹកនាំ និងទាហានរាប់ពាន់នាក់ នឹងដើរតាមក្រុមមេដឹកនាំរបស់ខ្លួន។ សារព័ត៌មាន Haaretz បានរាយការណ៍ថា ជនជាតិអ៊ីស្រាអែល ៦នាក់ រួមមានកុមារម្នាក់ក៏ត្រូវបានសម្លាប់ផងដែរ ដោយការបាញ់គ្រាប់រ៉ូកែតពីសំណាក់ក្រុមហាម៉ាស់៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
