ភ្នំពេញ ៖ ឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានក្រុមការងារ​ថ្នាក់ជាតិចុះ​ជួយមូលដ្ឋានខណ្ឌសែនសុខ សូមឲ្យប្រជាពលរដ្ឋបន្តគាំទ្រ និងជឿជាក់លើការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដើម្បីរក្សានូវសុខសន្តិភាព និងការរីកចម្រើនបន្តទៅទៀត។

​ការថ្លែងយ៉ាងដូច្នេះ នាឱកាសដែរឯកឧត្តមសាស្រ្តាចារ្យ ម៉ម ប៊ុនហេង អមដំណើរជាមួយលោកជំទាវ វេជ្ជបណ្ឌិត យក់ សម្បតិ្ត រដ្ឋលេខាធិការប្រចាំការក្រសួងសុខាភិបាល បានដឹកនាំក្រុមគ្រូពេទ្យស្ម័គ្រចិត្ដ នៃក្រុមការងារ​ថ្នាក់ជាតិ​ចុះជួយមូលដ្ឋានសង្កាត់ភ្នំពេញថ្មី ពិនិត្យ ពិគ្រោះ ព្យាបាលជំងឺ ផ្តល់ឱសថដោយឥតគិតថ្លៃ និង​ចាក់វ៉ាក់​សាំង​បង្ការ​ជំងឺកូវីដ-១៩ដូសជំរុញ ជូនប្រជាពលរដ្ឋ នៅសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ នាថ្ងៃទី២២ ខែមិថុនា ឆ្នាំ២០២៣នេះ។

ឯកឧត្តមសាស្ត្រាចារ្យ ម៉ម ប៊ុនហេង បានថ្លែងថា ការជួបជុំនាថ្ងៃនេះ ក្រៅពីការផ្តល់សេវាសុខាភិបាល ក៏ដើម្បី​រំលឹកឲ្យបងប្អូនប្រជាពលរដ្ឋ ត្រៀមខ្លួនចូលរួមការបោះឆ្នោត នាថ្ងៃទី២៣ ខែកក្កដា ឆ្នាំ២០២៣ខាងមុខនេះ ត្រូវមាន​ឯកសារអ្វីខ្លះបម្រើដល់ការបោះឆ្នោត។ ភ្ជាប់ជាមួយនេះ ក្រុមគ្រូពេទ្យស្ម័គ្រចិត្ត ក៏ធ្វើការពិនិត្យជំងឺទូទៅ ព្យាបាលជំងឺភ្នែក(ផ្តល់វ៉ែនតា) រោគស្រី្ត សើស្បែក និងផ្តល់រទេះជូនជនពិការផងដែរ។

​ជាមួយគ្នានោះដែរប្រជាពលរដ្ឋរស់នៅភូមិពោងពាយ និងភូមិទំនប់ សង្កាត់ភ្នំពេញថ្មី បានបង្ហាញអារម្មណ៍សប្បាយ​រីករាយដែលក្រុមគ្រូពេទ្យស្ម័គ្រចិត្ត ដឹកនាំដោយឯកឧត្តមសាស្រ្តាចារ្យ ម៉ម ប៊ុនហេង តែងតែយកចិត្ត​ទុកដាក់​ដើម្បីលើកកម្ពស់សុខភាព និងសុខមាលភាពជូនប្រជាពលរដ្ឋរស់នៅក្នុងមូលដ្ឋានសង្កាត់ភ្នំពេញថ្មីនេះ វត្តមាន​របស់ក្រុមគ្រូពេទ្យស្ម័គ្រចិត្តទាំងអស់ បានបញ្ជាក់អំពីការយកចិត្តទុកដាក់ខ្ពស់ ក្នុងការជួយដល់មូលដ្ឋានសង្កាត់ ដែលជាការរួមចំណែកកាត់បន្ថយភាពក្រីក្រមួយកម្រិតផងដែរ។

​បើតាមលោក ជុំ សារ៉ាយ ចៅសង្កាត់ភ្នំពេញថ្មី បានឲ្យដឹងថា សង្កាត់ភ្នំពេញថ្មី ជាសង្កាត់មួយក្នុងចំណោមសង្កាត់ទាំង៦ នៃខណ្ឌសែនសុខ ចែកចេញជា៦ភូមិ និង៤០ក្រុម មានប្រជាពលរដ្ឋសរុប៧,៧៥៣គ្រួសារ ស្មើនឹង៣៤,០០៥នាក់ អាយុ១៨ឆ្នាំឡើង មានចំនួន២៤,៦៩៤នាក់៕ អត្ថបទ៖ រដ្ឋា​