ភ្នំពេញ៖ ក្រសួងប្រៃសណីយ៍ និងទូរគមនាគមន៍ នៅព្រឹកថ្ងៃទី២២ ខែមិថុនានេះ បានប្រគល់ពានរង្វាន់​ដល់ម្ចាស់​ជ័យលាភីចំនួន ១០នាក់ ក្នុងការប្រកួតប្រជែងសសេរសំបុត្រថ្នាក់ជាតិលើកទី២ ឆ្នាំ២០២៣ លើប្រធានបទ “ចូរស្រមៃថា អ្នកគឺជាវីរៈបុរសដ៏អស្ចារ្យ ហើយបេសកកម្មរបស់អ្នកគឺធ្វើឱ្យផ្លូវថ្នល់ទាំង​អស់នៅ​ជុំវិញពិភពលោក​កាន់តែមានសុវត្ថិភាពសម្រាប់កុមារ។ សូមសរសេរសំបុត្រទៅកាន់នរណាម្នាក់ ពន្យល់អំពីអំណាចណា​ខ្លះ​ដែល​អ្នកនឹងត្រូវការដើម្បីសម្រេចបាននូវបេសកកម្មរបស់អ្នក”។

​ឯកឧត្តម ជា វ៉ាន់ដេត រដ្ឋមន្រ្តីក្រសួងប្រៃសណីយ៍ និងទូរគមនាគមន៍ បានមានប្រសាសន៍ថា សិស្សានុសិស្ស​ទាំងអស់ ពិតជាទទួលបានបទពិសោធន៍ល្អៗ តាមរយៈការចូលរួមការប្រកួតប្រជែងនេះ ដែលជួយដល់ការ​បង្កើនសមត្ថភាព ការយល់ដឹង ទំនុកចិត្ត និងការសម្រេចជោគជ័យក្នុងការសិក្សា ក៏ដូចជាការប្រកួតប្រជែង​ដទៃទៀតទាំងក្នុងស្រុក និងអន្តរជាតិ។ ឯកឧត្តម បានបន្តថាការប្រកួតប្រជែងនេះ រៀបចំឡើងក្នុង​គោល​បំណង​លើកកម្ពស់សមត្ថភាពគំនិតច្នៃប្រឌិតសិស្សានុសិស្សលើការស្រាវជ្រាវ ទេពកោសល្យក្នុងការសរសេរ ការវិភាគ​លើបញ្ហា ដោះស្រាយបញ្ហា និងស្វែងរកដំណោះស្រាយ ព្រមទាំង​អាចស្វែងយល់​ពីការប្រើប្រាស់​សេវាបញ្ញើ​ប្រៃសណីយ៍​ និងបញ្ញើឆាប់រហ័ស។

​នៅក្នុងឱកាសនោះ ឯកឧត្តមរដ្ឋមន្រ្តី បានកោតសរសើរ និងវាយតម្លៃខ្ពស់ ហើយបានលើកទឹកចិត្ត​ដល់ក្មួយៗ​ជ័យលាភី ទាំងអស់ ត្រូវខិតខំព្យាយាមរៀនសូត្របន្ថែមទៀតដើម្បីឱ្យក្លាយជាសិស្សល្អ មិត្តល្អ កូនល្អ និងពលរដ្ឋល្អ។ ឯកឧត្តមបន្ថែមទៀតថា វិស័យប្រៃសណីយ៍ មានសក្តានុពលក្នុងការ​ចូលរួមចំណែក​ដល់ការទ្រទ្រង់​កំណើនសេដ្ឋកិច្ច​ជាតិ និងការលើកកម្ពស់ជីវភាពប្រចាំថ្ងៃរបស់ប្រជាជនកម្ពុជា ដោយបានដើរតួនាទីសំខាន់​ក្នុងការទំនាក់ទំនង​គ្នាទាំងក្នុងទីក្រុង និងរហូតដល់ជនបទ។

សូមបញ្ជាក់ថា សម្រាប់បេក្ខជនជ័យលាភីលេខ១ ពីការប្រកួតប្រជែងសសេរសំបុត្រថ្នាក់ជាតិលើកទី២នេះ ត្រូវ​ជ្រើសរើសបន្តឱ្យចូលរួមជាតំណាងរបស់កម្ពុជា នៅក្នុងកម្មវិធីប្រកួតប្រជែងកម្រិតអន្តរជាតិ រៀបចំដោយសហភាព​ប្រៃសណីយ៍សកល ដែលមានការចូលរួមប្រកួតប្រជែងពីបណ្ដាប្រទេស១៩២ នៅលើពិភពលោក។ ហើយលទ្ធផលនៃការប្រកួតនឹងត្រូវប្រកាសនៅក្នុងអំឡុងទិវាប្រៃសណីយ៍ពិភពលោក នាថ្ងៃទី៩ ខែតុលា ឆ្នាំ២០២៣ ខាងមុខ៕ អត្ថបទ​ ៖ ឈិត បូរ៉ាវី​