ជនរងគ្រោះដោយសារការកេងប្រវ័យ្ចកម្លាំងពលកម្មរាប់រយនាក់ ត្រូវបានរកឃើញនៅទីតាំងផ្សេងគ្នាជាច្រើនកន្លែងជិតរដ្ឋធានី Lisbonរបស់ប្រទេសព័រទុយហ្គាល់ ដែលរួមទាំងនៅក្នុងទីតាំងឃ្លាំងដ៏ធំមួយ ជាទីដែលពួកគេត្រូវបានរក្សាទុកឲ្យធ្វើការប្រមូលផលខ្យងសមុទ្រខុសច្បាប់ ។ 

នគរបាលដែនសមុទ្រដែលដឹកនាំការស៊ើបអង្កេត និយាយនៅក្នុងសេចក្តីថ្លែងការណ៍ថា មកទល់នឹងពេលនេះជនរងគ្រោះទាំងអស់ ២៤៣នាក់ ត្រូវបានគេផ្តល់អត្តសញ្ញាណថាជាជនអន្តោប្រវេសន៍ ដោយភាគច្រើននៃពួកគេមកពីអាស៊ីអាគ្នេយ ។ 

ក្រុមនគរបាលនិយាយថា សមាជិក ៤នាក់នៃបណ្តាញឧក្រិដ្ឋកម្ម ដែលពាក់ព័ន្ធនឹងការប្រមូលផលខុសច្បាប់ និងការធ្វើជំនួញខ្យងសមុទ្រ ត្រូវបានឃាត់ខ្លួន ខណៈដែលប្រតិបត្តិការឆេកឆេរ នៅតែបន្ត ។  

ក្រុមមន្រ្តីជិត ៣០០នាក់ រួមទាំងក្រុមមន្រ្តីមកពីក្រុមនគរបាល និងទីភ្នាក់ងារព្រំដែន SEF បានចូលរួមប្រតិបត្តិការមួយនេះ ដែលមានទាំងការវាយឆ្មក់ជាច្រើនផងដែរ ។ 

ទីភ្នាក់ងារព័ត៌មានរ៉យទ័រ បានមើលឃើញប្រតិបត្តិការរបស់ក្រុមនគរបាលនៅអគារ ២ខ្នង ស្ថិតក្នុងភូមិ Samoucoនៅច្រាំងខាងត្បូងនៃទន្លេ Tagus ។ 

គេបានមើលឃើញក្រុមមន្រ្តីដើរចេញ-ចូលអគារ ពេលដែលជនអន្តោប្រវេសន៍រង់ចាំនៅខាងក្នុង ។ គេនៅមិនទាន់ដឹងច្បាស់នោះទេថាតើជនអន្តោប្រវេសន៍ប៉ុន្មាននាក់ បាននៅក្នុងអគារនោះ ហើយមានអគារប៉ុន្មានខ្នងទៀត ត្រូវបានឆេកឆេរ ៕