តាមរយៈទំព័រហ្វេសប៊ុកផ្លូវការរបស់ឯកឧត្តម ហ៊ុន ម៉ានី នៅថ្ងៃទី២៣ ខែមិថុនា ឆ្នាំ២០២៣នេះ បាន​បញ្ជាក់ថា ថ្ងៃនេះ រដ្ឋសភា នៃព្រះរាជាណាចក្រកម្ពុជា កំពុងពិភាក្សា និង​អនុម័ត​សេចក្តី​ព្រាង​ច្បាប់ ស្តីពីវិសោធនកម្មច្បាប់បោះឆ្នោតនានា ដែលរួម​មាន​ច្បាប់ស្តីពី​ការ​បោះឆ្នោត​ជ្រើស​តាំង​តំណាង​រាស្រ្ត, ច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំ សង្កាត់, ច្បាប់ស្តី​ពី​ការ​បោះឆ្នោត​ជ្រើស​តាំង​សមាជិកព្រឹទ្ធសភា និងច្បាប់ស្តីពីការបោះឆ្នោតជ្រើសរើសក្រុមប្រឹក្សារាជធានី ក្រុម​ប្រឹក្សា​ខេត្ត ក្រុមប្រឹក្សាក្រុង ក្រុមប្រឹក្សាស្រុក និងក្រុមប្រឹក្សាខណ្ឌ ដើម្បី​កែ​ទម្រង់​បទប្បញ្ញត្តិ​មួយចំ​នួន​ពាក់ព័ន្ធលក្ខខណ្ឌចំពោះប្រជាពលរដ្ឋខ្មែរ ដែលមានបំណងឈរឈ្មោះឱ្យគេបោះឆ្នោត ដែល​ច្បាប់វិសោធនកម្មនេះ ធ្វើឡើងស្របតាមមាត្រា៣៤ថ្មី នៃរដ្ឋធម្មនុញ្ញ ដែលបានចែងថា " បទ​ប្បញ្ញត្តិដកសិទ្ធិបោះឆ្នោត និងសិទ្ធិឈរឈ្មោះឱ្យគេបោះឆ្នោតត្រូវកំណត់ក្នុងច្បាប់"។ បើទោះបីជាឯកឧត្តម ត្រូវអវត្តមានពីអង្គប្រជុំដោយមានធុរៈចាំបាច់ ឯកឧត្តម បានតាមដាន និងពិនិត្យ​យ៉ាងយកចិត្តទុកដាក់បំផុតនូវដំណើរការនៃការពិភាក្សា នៃសេចក្តីព្រាងច្បាប់មួយនេះ។

ការ​ធ្វើ​វិសោធនកម្មនាពេលនេះ គឺជាការបញ្ជាក់ឡើងវិញនូវការទទួលខុសត្រូវ និងគុណសម្បត្តិ ដែល​បេក្ខជន​ឈរឈ្មោះបោះឆ្នោតត្រូវមាន សម្រាប់បង្ហាញ​ពី​ការជឿ​ជាក់​លើ​ប្រព័ន្ធ​ប្រជាធិបតេយ្យ និងនីតិរដ្ឋ នៃប្រទេសរបស់ខ្លួន ដោយមិនបានដកហូត ឬរឹត​បន្តឹង​សិទ្ធិជា​មូលដ្ឋា​ន​ណាមួយឡើយ។ ផ្ទុយមកវិញ វិសោធនកម្មនាពេលនេះ ជាការបង្កើនទំនុកចិត្តកាន់តែខ្ពស់ ពី​សំណាក់​ប្រជាពលរដ្ឋ ដែលជាម្ចាស់ឆ្នោត ចំពោះបេក្ខភាព ដែលឈរឈ្មោះជាតំណាងរបស់ខ្លួន។ ជាងនេះទៅទៀត ការធ្វើវិសោធនកម្មនេះ ក៏នឹងចូលរួមចំណែកក្នុងការធានាភាពរលូន និង​ការ​ជឿ​ទុក​ចិត្តបាន នៃដំណើរការបោះឆ្នោត និងក៏ដូចជា​ការ​ឆ្លុះ​បញ្ចាំង​ឲ្យ​ឃើញកាន់​តែ​ច្បាស់​ពី​ភាព​ចាស់​ទុំ​របស់​កម្ពុជា ជានីតិរដ្ឋ។

ក្នុងនាមប្រជាពលរដ្ឋខ្មែរ ដែលបាន និងកំពុងរស់នៅក្នុងសន្តិភាព ប្រជាធិបតេយ្យ និងនីតិរដ្ឋ ឯកឧត្តម ហ៊ុន ម៉ានី សូមប្រកាសគាំទ្រចំពោះការធ្វើវិសោធនកម្មច្បាប់បោះឆ្នោតនេះ ដើម្បី​ចូល​រួម​លើក​ស្ទួយគុណតម្លៃ នៃលទ្ធិប្រជាធិបតេយ្យ សេរីពហុបក្ស ដែលបានចារឹក​នៅ​ក្នុ​ង​រដ្ឋ​ធម្មនុញ្ញ​ នៃ​ព្រះរាជាណាចក្រកម្ពុជា ដែលជាច្បាប់កំពូលរបស់ជាតិ៕ អត្ថបទ៖ រដ្ឋា