ភ្នំពេញ៖ ឯកឧត្តម ប្រាក់ សុណ្ណារ៉ា រដ្ឋលេខាធិការក្រសួងវប្បធម៌ និងវិចិត្រសិល្បៈបានបញ្ជាក់ថា បច្ចុប្បន្ននេះ មន្រី្តជំនាញរបស់ក្រសួងកំពុងបន្តរកឃើញវត្ថុសិល្បៈក្នុងបាតសមុទ្រពី​បណ្ដាខេត្តជាប់​សមុទ្រមួយចំនួនក្នុងប្រទសកម្ពុជា នឹងបានយកមកសិក្សាស្រាវជ្រាវ ដើម្បីអភិរក្សទុកជាសម្បត្តិរបស់ជាតិ។

ឯកឧត្តម ប្រាក់ សុណ្ណារ៉ា បានថ្លែងប្រាប់ទូរទស្សន៍ BTV ថា វត្ថុសិល្បៈក្រោមបាតសមុទ្រ ដែលរកឃើញចុង​ក្រោយនេះ​គឺទទួលបាននូវព័ត៌មាន និងកិច្ចសហការជាមួយនឹងកងទ័ពប្រចាំ​នៅតំបន់រាម ដោយបានរកឃើញ ​និងស្រង់ចេញពីសំពៅលិច​ក្រោមបាតសមុទ្រ ហើយបញ្ជូន​អ្នកជំនាញទៅពិនិត្យ ​ដើម្បីយកមក រក្សាទុកនៅក្នុងសារមនី្ទរ។

ឯកឧត្តម បានឱ្យដឹងថា វត្ថុសិល្បៈដែលរកឃើញនៅក្នុងសំពៅ​ដែលលិចនៅបាតសមុទ្រ​នៃ​ខេត្តកោះកុងនោះ មន្រី្តជំនាញបានទទួលព័ត៌មានតាំងពីឆ្នាំ ២០០៦ មក ដូច្នេះមន្រី្តក៏បានស្រង់​យកវត្ថុ​សិល្បៈទាំងនោះមកលើគោក ​ដើម្បីយកមករក្សាទុកនៅក្នុងឃ្លាំងមួយនៃខេត្តកោះកុង ដែលបច្ចុប្បន្ន​ជាមនី្ទរវប្បធម៌ ​និងវិចិត្រសិល្បៈខេត្ត ​ក៏បានរៀបចំជា​សាលពិព័រណ៍​ ដើម្បីអភិរក្ស និង​សិក្សាស្រាវជ្រាវបន្ត។

លោក ទេព សុខា ប្រធានការិយាល័យវិភាគ ​និងពិសោធន៍ ​ដែលមានជំនាញក្នុងការសិក្សាវិភាគ និងការជួសជុល បានប្តេជ្ញា ​ខិតខំការងារជួសជុល​ និងអភិរក្សសមុច្ច័យបុរាណវិទ្យា ដើម្បីអភិរក្សបន្ត។ លោកបន្តថា នឹងបន្តប្រឹងប្រែងបង្ហាត់បង្រៀន​ដល់សិស្ស-និស្សិត​ជំនាន់ក្រោយពីជំនាញបុរាណវិទ្យានេះដែល​ ធនធានសំខាន់សម្រាប់ការងារប្រទេសជាតិ៕អត្ថបទ រដ្ឋា