ភ្នំពេញ៖ អតីតយុទ្ធជន ដែលជាផ្នែកមួយក្នុងការកសាងសន្តិភាពសម្រាប់កម្ពុជា លើកឡើងថា ពួកគេ នៅតែមានភាពជឿជាក់ គាំទ្រចំពោះរាជរដ្ឋាភិបាល។ ការរក្សាគោលជំហរនេះ ដោយសារពួកគេមើលឃើញពីភាពសុខសាន្តដែលប្រជាពលរដ្ឋគ្រប់រូបទទួលបាន ក៏ដូចជាការរីកចំរើនជាបន្តបន្ទាប់ឥតឈប់ឈររបស់សង្គមជាតិ។

អតីតយុទ្ធជន ដែលឆ្លងកាត់ច្រើនសម័យកាល ក៏ដូចជាប្រឡូកក្នុងជីវិតសង្រ្គាមជាច្រើនឆ្នាំ ក្នុងអតីតកាល បានបង្ហាញ​នូវស្នាមញញឹម ភាពពេញចិត្តគ្រប់គ្នា ក្នុងឱកាសជួបជុំទិវាអតីត​យុទ្ធជន​កម្ពុជា។ គ្រាជួបជុំគ្នានាពេលនេះ ពួកគាត់បានជជែកគ្នា ពីភាពលំបាក ​ការប្រយុទ្ធទល់នឹងសត្រូវ ក៏ដូចជាភាពសុខសាន្ត ​ការរីកចំរើនរបស់សង្គមជាតិនាពេលបច្ចុប្បន្ន។

ពួកគាត់លើកឡើងថា ពិតជាមោទនភាពដែលបានរួមចំណែក លះបង់សាច់ស្រស់​ ឈាមស្រស់ ក្នុងការកសាងសន្តិភាពមួយនេះ។ ទន្ទឹមនឹងការលើកឡើងដូចនេះ​ ពួកគាត់ក៏បង្ហាញភាពជឿជាក់ និងបន្តគាំទ្ររាជរដ្ឋាភិបាលក្រោមការដឹកនាំរបស់គណបក្សប្រជាជនកម្ពុជា ដែលបានដឹកនាំ​ប្រទេសជាតិ​ឱ្យមានសុខសន្តិភាព ​ផ្ដល់ការរស់នៅដែលគ្មានភាព​ភ័យខ្លាចឱ្យប្រជាពលរដ្ឋ និងនាំមកការរីកចំរើនឥតឈប់ឈរ។

ការពេញចិត្ត និងការបន្តគាំទ្ររាជរដ្ឋាភិបាលក្រោមការដឹកនាំ របស់គណបក្សប្រជាជនកម្ពុជា ក៏ភ្ជាប់មកជាមួយនឹងការយកចិត្តទុកដាក់ គាំទ្រ ​ការជួយសម្រួលជីវភាព ចំពោះអតីតយុទ្ធជនគ្រប់​រូបផងដែរ។ នេះជាការបញ្ជាក់ថែមរបស់អតីតយុទ្ធជន។

ឯកឧត្តម នឹម ថូត រដ្ឋលេខាធិការប្រចាំការ នៃក្រសួងសង្គមកិច្ច អតីតយុទ្ធជន និងយុវនីតិសម្បទា បានលើកឡើងក្នុងការជួបជុំជាមួយអតីតយុទ្ធជនថា រាជរដ្ឋាភិបាលកម្ពុជា​ ក្នុងពេលបច្ចុប្បន្ន បានដំឡើងរបបសន្តិសុខសង្គមប្រចាំខែជូនដល់អតីតយុទ្ធជនជាបន្តបន្ទាប់។ ​ជាក់ស្ដែងឆ្នាំ ២០២៣នេះ​ គឺអតីតយុទ្ធជន ទទួលបានតិចបំផុតគឺ ៧៧ម៉ឺនរៀល ក្នុងមួយខែ ខណៈពេលមុន ទទួលបានទាបជាង រឺស្មើ ៦៩ម៉ឺនរៀលប៉ុណ្ណោះ។

លើសពីទទួលបានប្រាក់សោធនរបបសន្តិសុខសង្គម ជាប្រចាំខែ អតីតយុទ្ធជន ក៏ទទួលបាន សេវាថែទាំសុខភាព ​ការពិនិត្យ និងព្យាបាលជំងឺដោយមិនបង់ប្រាក់ ​នៅមន្ទីរពេទ្យសាធារណៈ និងឯកជន ដែលបានចុះកិច្ចព្រមព្រៀងជាមួយបេឡាជាតិរបបសន្តិសុខ សង្គម។ រាជរដ្ឋាភិបាល គិតត្រឹមឆ្នាំ ២០២៣នេះ ក៏បានផ្ដល់ផ្ទះជូនគ្រួសារអតីតយុទ្ធជន ​បានចំនួន៥ ១៥៤ ខ្នង។ លើសពីនេះ ក៏មានការឧបត្ថម្ភ ក្នុងឱកាសបុណ្យចូលឆ្នាំប្រពៃណីជាតិខ្មែរចំនួន ៥ ម៉ឺនរៀលផងដែរ៕អត្ថបទ៖គឹមហុក