ប្រធានាធិបតីសហរដ្ឋអាមេរិកលោក Joe Biden បាននិយាយសម្រាលពីការប៉ះពាល់នៃការអធិប្បាយរបស់លោកដែលប្រដូចសមភាគីចិនលោក Xi Jinping ទៅនឹងជនផ្តាច់ការ ទោះបីរដ្ឋាភិបាលចិនបានព្រមានអំពីផលវិបាកសម្រាប់ការលើកឡើងរបស់លោកក៏ដោយ។

លោក Biden បាននិយាយនៅក្នុងសន្និសីទសារព័ត៌មានកាលពីថ្ងៃព្រហស្បតិ៍ថា «ខ្ញុំមិនគិតថាវាមានផលវិបាកអ្វីនោះទេ» ដោយបានច្រានចោលការព្រួយបារម្ភដែលថា ទំនាក់ទំនងរវាងសហរដ្ឋអាមេរិក និងចិន ដែលកាន់តែអាក្រក់ទៅៗថាជា «ការព្រួយបារម្ភជ្រុលហួសហេតុ» ។

ប្រធានាធិបតីសហរដ្ឋអាមេរិក បាននិយាយថា លោករំពឹងថានឹងជួបលោក Xi ក្នុងពេលដ៏ខ្លីខាងមុខ ហើយបានស្នើថា លោកនឹងមិន​បន្ធូរបន្ថយ ការប្រើប្រាស់វោហារសាស្ត្ររបស់លោក​នៅពេលអនាគតនោះទេ។

លោក Biden បាននិយាយថា «គំនិតដែលខ្ញុំជ្រើសរើស និងបញ្ចៀសការនិយាយអ្វីដែលខ្ញុំគិតថាជាការពិត ទាក់ទងនឹងទំនាក់ទំនងជាមួយប្រទេសចិន ពុំមែនជាអ្វីដែលខ្ញុំនឹងផ្លាស់ប្តូរនោះទេ”។ ការអត្ថាធិប្បាយរបស់លោកបានធ្វើឡើងមួយថ្ងៃបន្ទាប់ពីឯកអគ្គរដ្ឋទូតចិនប្រចាំនៅសហរដ្ឋអាមេរិក លោក Xie Feng បានធ្វើបទបង្ហាញដ៏ហ្មត់ចត់ និងមានការតវ៉ាយ៉ាងខ្លាំង​ចំពោះមន្ត្រីជាន់ខ្ពស់​របស់សេតវិមាន និងក្រសួងការបរទេសសហរដ្ឋអាមេរិកកាលពីថ្ងៃទី ២១ខែមិថុនា អំពីការអត្ថាធិប្បាយរបស់លោក Biden ដែលស្ថានទូតចិនចាត់ទុកថាជា «ការបង្ខូចឈ្មោះ»។ នោះ ផ្ទុយស្រឡះពីការពិតជាមូលដ្ឋាន បំពានក្រមសីលធម៌ផ្នែកការទូត រំលោភលើសេចក្តីថ្លៃថ្នូរខាងនយោបាយរបស់ចិន ប្រឆាំងការប្តេជ្ញាចិត្តដែលធ្វើឡើងដោយភាគីអាមេរិក និងធ្វើឱ្យខូចដល់ការជឿទុកចិត្តគ្នាទៅវិញទៅមក។

សេចក្តីថ្លែងការណ៍កាលពីថ្ងៃព្រហស្បតិ៍ពីស្ថានទូតបាននិយាយថា យើងជំរុញឱ្យភាគីអាមេរិកមានចំណាត់ការយ៉ាងម៉ឺងម៉ាត់ភ្លាមៗ ដើម្បីបកស្រាយឡើងវិញពីផលប៉ះពាល់អវិជ្ជមាន និងគោរពការប្តេជ្ញាចិត្តរបស់ខ្លួន។ បើមិនដូច្នេះទេ អាមេរិកនឹងត្រូវទទួលរងផលវិបាកទាំងអស់។