សីតុណ្ហភាពនៅក្នុងទីក្រុងប៉េកាំងបានឡើងដល់ ៤១ អង្សាសេកាលពីថ្ងៃព្រហស្បតិ៍ ទី២២ ខែមិថុនា ហើយបានឈានដល់កំណត់ត្រាខ្ពស់សម្រាប់ថ្ងៃក្តៅបំផុតក្នុងខែមិថុនា ខណៈរលកកម្តៅដែលបានវាយប្រហារនៅភាគខាងជើងប្រទេសចិនកាលពីសប្តាហ៍មុន បានវិលត្រឡប់មករដ្ឋធានីប្រទេសចិនវិញ។

ស្ថានីយអាកាសធាតុមួយនៅតំបន់ជាយក្រុងភាគខាងត្បូង ដែលត្រូវបានគេចាត់ទុកថា ជាកម្រិតវាស់ស្ទង់សំខាន់របស់ទីក្រុងប៉េកាំង បានកត់ត្រា ៤១,១អង្សាសេ នៅម៉ោង ៣:១៩នាទី រសៀល ខណៈនៅក្រុង Tanghekou ជាទីប្រជុំជននៅភាគឦសានទីក្រុងប៉េកាំង សីតុណ្ហភាពបានឈានកាន់តែខ្លាំងដល់ ៤១,៨អង្សាសេ ។

ទីក្រុងប៉េកាំងបានបង្កើនការប្រកាសអាសន្នពណ៌លឿងទុំ ដែលជាការព្រមានអំពីអាកាសធាតុធ្ងន់ធ្ងរបំផុតកម្រិតទីពីរ ដោយនិយាយថា សីតុណ្ហភាពអាចឡើងខ្ពស់ដល់ ៣៩អង្សាសេ ចាប់ពីថ្ងៃព្រហស្បតិ៍ដល់ថ្ងៃសៅរ៍ ទី២៤ ខែមិថុនា។ នៅមជ្ឈមណ្ឌលផ្លាហ្សានៅទីក្រុងប៉េកាំងភាគកណ្តាល គេឃើញមនុស្សកំពុងរកកន្លែងជ្រកពីកម្តៅនៅតាមប្រភពទឹកសាធារណៈ និងម្លប់ឆ័ត្រធំៗដែលនៅក្បែរៗនោះ។

កាលពីសប្តាហ៍មុន ការិយាល័យឧតុនិយមជាតិបានចេញការប្រកាសអាសន្នសម្រាប់ជំងឺសុរិយរោគជាឣាការៈសន្លប់ដោយសារកម្តៅរយៈពេលជិត២សប្តាហ៍ ដោយសីតុណ្ហភាពកំណត់ត្រាថ្មីសម្រាប់ខែមិថុនា បានវាយប្រហារទីក្រុងនានានៅភាគខាងជើងប្រទេសចិន។

នៅក្នុងទីក្រុងកំពង់ផែ Tianjin តម្រូវការដែលការកើនឡើងសម្រាប់ការប្រើប្រាស់ម៉ាស៊ីនត្រជាក់ បានជំរុញបន្ទុកបណ្តាញអគ្គិសនីដល់ ១៤,៥៤ លានគីឡូវ៉ាត់កាលពីថ្ងៃទី ១៥ ខែមិថុនា កើនឡើង ២៣ ភាគរយធៀបនឹងឆ្នាំមុន។