ក្នុងដំណើរទស្សនកិច្ចរបស់លោកទៅកាន់ប្រទេសវៀតណាម ប្រធានាធិបតីកូរ៉េខាងត្បូងលោក Yoon Suk Yeol គ្រោងនឹងជួបពិភាក្សាជាមួយមេដឹកនាំនៃប្រទេសនេះ នៅថ្ងៃសុក្រ (ទី២៤ ខែមិថុនា) ដោយជំនួបនេះ កើតមានឡើងនៅក្នុងចំណុចផ្លាស់ប្ដូរដ៏សំខាន់នៃទំនាក់ទំនងរបស់ប្រទេសទាំងពីរ ដោយសារពាណិជ្ជកម្មទ្វេភាគី ធ្លាក់ចុះ ហើយទីក្រុងហាណូយគ្រោងដំឡើងពន្ធ សម្រាប់រោងចក្ររបស់ក្រុមហ៊ុនធំៗនៃប្រទេសកូរ៉េខាងត្បូង។

ក្នុងរយៈពេលប៉ុន្មានទស្សវត្សរ៍ចុងក្រោយនេះ ប្រទេសទាំងពីរបានបង្កើតទំនាក់ទំនងឧស្សាហកម្មស្ទើរតែគ្រប់យ៉ាង ដោយកូរ៉េខាងត្បូងជាអ្នកវិនិយោគបរទេសច្រើនគេ នៅប្រទេសវៀតណាម។ ប៉ុន្តែប្រភពពីឧស្សាហកម្ម និងធុរកិច្ចជាច្រើន បានឲ្យដឹងថា ការធ្លាក់ចុះនៃសេដ្ឋកិច្ចពិភពលោក កំពុងធ្វើឲ្យទំនាក់ទំនងជិតស្និទ្ធនេះធ្លាក់ទៅក្នុងស្ថានភាព ដែលបង្ហាញថា រឹងមាំកម្រិតណា ខណៈការធ្លាក់ចុះនៃការបញ្ជាទិញទំនិញអេឡិចត្រូនិក បង្ខំឲ្យក្រុមហ៊ុនកូរ៉េខាងត្បូងកាត់បន្ថយកម្លាំងពលកម្ម នៅវៀតណាម។

បញ្ហាកាន់តែស្មុគស្មាញឡើង នៅពេលដែលទីក្រុងហាណូយគ្រោង ចាប់ពីឆ្នាំក្រោយទៅ នឹងដាក់ចេញនូវការយកពន្ធថ្មីលើសាជីវកម្មធំៗ រួមទាំងក្រុមហ៊ុនពហុជាតិកូរ៉េធំៗ ដែលជាផ្នែកមួយនៃកំណែទម្រង់សកលនៃច្បាប់ពន្ធ ដែលអាចកាត់បន្ថយការអំពាវនាវរបស់វៀតណាម ក្នុងនាមជាមជ្ឈមណ្ឌលផលិតកម្ម។

យ៉ាងណាក្ដី ការិយាល័យរបស់លោកប្រធានាធិបតីកូរ៉ូខាងត្បូង បានឲ្យដឹងថា ដើម្បីព្យាយាមដោះស្រាយបញ្ហាទាំងនោះ លោក Yoon ក្នុងដំណើរទស្សនកិច្ចលើកដំបូងរបស់លោកទៅកាន់ប្រទេសវៀតណាមក្នុងនាមជាប្រធានាធិបតី ត្រូវបានអមដំណើរដោយគណៈប្រតិភូធុរកិច្ចចំនួន ២០៥នាក់។

មុនដំណើរទស្សនកិច្ចរយៈពេល ៣ថ្ងៃរបស់លោក ដែលបានចាប់ផ្តើមកាលពីថ្ងៃព្រហស្បតិ៍ (ទី២២ ខែមិថុនា) លោក Yoon បានប្រាប់ថា លោកសង្ឃឹមថា នឹងពង្រឹងកិច្ចសហប្រតិបត្តិការផ្នែកសន្តិសុខ។ កូរ៉េខាងត្បូងគឺជាប្រទេសមួយក្នុងចំណោមប្រទេសជាច្រើនដែលពិភាក្សាអំពីការលក់អាវុធដែលអាចនឹងកើតមានទៅឲ្យប្រទេសវៀតណាម។ គេរំពឹងថា ប្រទេសទាំងពីរ ក៏នឹងយល់ព្រមលើការវិនិយោគថ្មីក្នុងការស្រាវជ្រាវផងដែរ៕