ក្រុមបាតុករចំនួនម្ភៃបួននាក់ត្រូវបានគេមើលឃើញធ្វើការតវ៉ានៅជិតសេតវិមានប្រឆាំងនឹងនាយករដ្ឋមន្ត្រីឥណ្ឌាលោក Narendra Modi ដែលធ្វើដំណើរទៅកាន់ក្រុងវ៉ាស៊ីនតោន នៅថ្ងៃព្រហស្បតិ៍ (២២ មិថុនា)។

ចាប់តាំងពីលោក Modi ចូលកាន់តំណែងកាលពីឆ្នាំ ២០១៤មក ឥណ្ឌាបានធ្លាក់ចុះពីលំដាប់លេខ ១៤០ ក្នុងសន្ទស្សន៍សេរីភាពសារព័ត៌មានពិភពលោក មកនៅត្រឹមលេខ ១៦១ ក្នុងឆ្នាំនេះ ដែលជាចំណុចទាបបំផុតរបស់ខ្លួន ខណៈដែលប្រទេសនេះក៏នាំមុខគេក្នុងបញ្ជីសម្រាប់ចំនួន នៃការបិទប្រព័ន្ធអ៊ីនធឺណិតខ្ពស់បំផុតទូទាំងពិភពលោកសម្រាប់រយៈពេលប្រាំឆ្នាំជាប់ៗគ្នា។

ការិយាល័យសិទ្ធិមនុស្សរបស់អង្គការសហប្រជាជាតិបានពណ៌នាច្បាប់ចូលសញ្ជាតិឆ្នាំ ២០១៩ ថាជា "ការរើសអើងជាមូលដ្ឋាន" សម្រាប់ការមិនរាប់បញ្ចូលជនអន្តោប្រវេសន៍មូស្លីម។ ក្រុមអ្នករិះគន់បានសំដៅទៅលើច្បាប់ប្រឆាំងការបំប្លែងដែលជំទាស់នឹងសិទ្ធិសេរីភាពក្នុងជំនឿដែលត្រូវបានការពារដោយរដ្ឋធម្មនុញ្ញ និងការដកហូតឋានៈពិសេសរបស់តំបន់ កាស្មៀរ ដែលជាតំបន់មានជនជាតិមូស្លីមរស់នៅភាគច្រើនកាលពីឆ្នាំ ២០១៩ ផងដែរ។

ក៏មានការរុះរើទ្រព្យសម្បត្តិដែលជាកម្មសិទ្ធិរបស់ជនជាតិម៉ូស្លីមផងដែរ ដោយធ្វើឡើងក្នុង នាមការរុះរើសំណង់ខុសច្បាប់ និងការហាមប្រាមមិនអោយពាក់ហ៊ីចាបរបស់ មូស្លីម (hijab) នៅក្នុងថ្នាក់រៀននៅរដ្ឋ Karnataka ពេលដែលគណបក្សប្រជាជនឥណ្ឌា BJP របស់លោកនាយករដ្ឋមន្រ្តី Modi កាន់អំណាច។

ប្រធានាធិបតីសហរដ្ឋអាមេរិកលោក Joe Biden បាននិយាយថា លោកនឹងពិភាក្សាអំពីបញ្ហាសិទ្ធិមនុស្សជាមួយលោកនាយករដ្ឋមន្ត្រីឥណ្ឌា Narendra Modi នៅថ្ងៃព្រហស្បតិ៍ បន្ទាប់ពីសកម្មជន និងសមាជិកសភារីកចម្រើននៃគណបក្សប្រជាធិបតេយ្យរបស់លោកបានជំរុញឱ្យលោកលើកបញ្ហានេះឡើងជាសាធារណៈ៕