ការបញ្ជាក់​កាលពី​ថ្ងៃ​ព្រហស្បតិ៍ (២២ មិថុនា​)​ថា​មនុ​ស្សទាំង​៥​នាក់​នៅលើ​នាវាមុជទឹក​ដែល​បាត់​នោះ បាន​ស្លាប់ ធ្វើ​ឲ្យ​ប្រជាជន​ក្រុង ញូវយ៉ក ដែល​នៅក្នុង​តំបន់​ប្រជុំជន Times Square មានប្រតិកម្ម​យ៉ាងខ្លាំង ដោយ​មនុស្សម្នា​បញ្ចេញ​ទស្សនៈ​ផ្សេងៗ​ជាច្រើន​រាប់​ចាប់ពី​ការ​កាន់ទុក្ខ​រហូតដល់​ការទទួលស្គាល់​ហានិភ័យ​ដែល​ពាក់ព័ន្ធ​។​

​លោក Shane Davis អ្នក​ផលិត​សំបក​កង់​ជនជាតិ​អង់គ្លេស​បាន​និយាយ​ក្នុង​បទសម្ភាសន៍​មួយ​នៅ​តំបន់ Times Square ថា «​ខ្ញុំ​គិតថា​ពួកគេ​ឆោតល្ងង់​ណាស់​។ និយាយ​ឲ្យ​ត្រង់​ទៅ ហេតុអ្វី​បានជា​មាន​អ្នក​ហ៊ាន​ប្រថុយ​ជីវិត បើ​គេ​ជា​អ្នកមាន​ទ្រព្យសម្បតិ្ត​ច្រើនសន្ធឹក​សន្ធាប់​បែប​នោះ​ទៅហើយ​?»

​ដំណឹង​នៃ​ការស្លាប់​នោះ​នាំមក​នូវ​ការបញ្ចប់​ដ៏​ក្រៀមក្រំ​នៃ​ការស្វែងរក​ជា​អន្តរជាតិ​សម្រាប់​នាវាមុជទឹក​ដែល​បាន​បាត់​ក្នុងអំឡុងពេល​ធ្វើដំណើរ​ក្នុង​សមុទ្រ​ដ៏​ជ្រៅ ទៅ​មើល​បំណែក​កប៉ាល់​ទី​តា​និក​ដែល​បាន​លិច​។ ហើយ​មាន​អ្នក​ថ្មើរជើង​ជាច្រើន​នៅ​តំបន់ Times Square បាន​ចងចាំ​ពី​ការបាត់បង់​នេះ​។​

​លោក Ray Guy គ្រូបង្រៀន​ផ្នែក​អប់រំ​កាយ​ដែល​ចូលនិវត្តន៍​នៅ​ទីក្រុង​ញូវយ៉ក​បាន​និយាយថា "​វា​ជា​ស្ថានភាព​ដ៏​សោកសៅ​នៅ​ជុំវិញ​ពិភពលោក​។ កប៉ាល់​ទី​តា​និ​ច​នោះបាន​ឆក់យក​ជីវិត​មនុស្ស​ប្រាំ​នាក់​បន្ថែម​ទៀតហើយ​" ។​

​គ្រូបង្រៀន​ភាសា​ន័​រ​វែ​ស ឈ្មោះ Alim Solhiam បាន​និយាយ​ក្នុងអំឡុងពេល​ដំណើរ​កម្សាន្ត​របស់លោក​ស្រី​នៅក្នុង​ទីក្រុង​ញូវយ៉ក​ថា "​មាន​អ្វី​ប្លែក និង​ពិសេស​ទៅ​អំពី​កប៉ាល់​ទី​តា​និ​ច​នោះ​។ ដូច្នេះ​ក្នុង​កម្រិត​ជាក់លាក់​មួយ ខ្ញុំ​អាច​យល់បាន​ថា​ហេតុអ្វី​ពួកគេ​ទាំងនោះ​ហ៊ាន​ប្រថុយ​ជីវិត​បែបនេះ​"៕​