ពេលដែលទូក ៤គ្រឿង ត្រូវបានសង្គ្រោះ ក្រុមសេវាកម្មសង្គ្រោះបន្ទាន់ និយាយថា ជនអន្តោប្រវេសន៍សរុប ២២៧នាក់ ត្រូវបានជួយសង្គ្រោះកាលពីថ្ងៃព្រហស្បតិ៍ នៅជិតប្រជុំកោះ Canary ដែនដីរបស់អេស្ប៉ាញ ពោល គឺរយៈពេល១ថ្ងៃប៉ុណ្ណោះ ក្រោយក្រុមសប្បុរសធម៌ និយាយថា ពួកគេមានការព្រួយបារម្ភថា ជនអន្តោប្រវេសន៍ជាង ៣០នាក់ បានស្លាប់ ក្រោយទូករបស់ពួកគេបានលិចនៅតាមផ្លូវតែមួយ។
ប្រជុំកោះ Canary ស្ថិតនៅជិតតំបន់ឆ្នេរអាហ្វ្រិកខាងលិច បានក្លាយជាគោលដៅសំខាន់សម្រាប់ជនអន្តោប្រវេសន៍ ដែលព្យាយាមធ្វើដំណើរទៅកាន់ដីគោកអេស្ប៉ាញ ក្នុងនោះចំនួនពួកគេតិចជាងនេះ បានព្យាយាមផងដែរ ធ្វើដំណើរឆ្លងកាត់សមុទ្រមេឌីទែរ៉ាណេ ដើម្បីទៅដល់ដីគោកអេស្ប៉ាញ ។ អំឡុងពេលរដូវក្តៅ គឺជាពេលវេលាដ៏មមាញឹកបំផុតសម្រាប់ជនអន្តោប្រវេសន៍ទាំងអស់ ដែលព្យាយាមឆ្លងកាត់។
កាលពីរសៀលថ្ងៃព្រហស្បតិ៍ បុរស ៤៩នាក់ ស្ត្រី ៧នាក់ និងអានីតិជន ៣នាក់ មកពីអនុតំបន់សាហារ៉ា ដែលធ្វើដំណើរតាមទូកតូច ត្រូវបានស្កាត់ចាប់បាន ហើយត្រូវបានបញ្ជូនទៅកាន់កំពង់ផែ Arguineguin ដោយនាវាឆ្មាំល្បាតឆ្នេរអេស្ប៉ាញ Macondo។
វាគឺជាទូកទី ៤ដែលត្រូវបានសង្គ្រោះនៅជិតប្រជុំកោះនៅក្នុងមហាសមុទ្រអាត្លង់ទិកមួយនេះ ក្នុងរយៈពេលតិចជាង ២៤ម៉ោង ។
ក្រុមមន្ត្រីអេស្ប៉ាញ និយាយកាលពីថ្ងៃពុធថា សាកសពក្មេងៗ និងបុរសម្នាក់ ត្រូវបានរកឃើញ ហើយទូកល្បាតម៉ារ៉ុក ធ្លាប់បានជួយសង្គ្រោះមនុស្ស ២៤នាក់ នៅលើទូកដែលបានលិច៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
