ភ្នំពេញ​៖ ភាគី​ចិន បាន​បញ្ជាក់ថា ក្នុងចំណោម​១០​ប្រទេស​ក្នុង​តំបន់​អាស៊ាន អ្នកសារព័ត៌មាន​កម្ពុ​ជា គឺជា​ក្រុមទី​១ ត្រូវបាន​អញ្ជើញ​ឲ្យ​ទស្សនកិច្ច​នៅ​វិទ្យាស្ថាន​កិច្ចការ​អាស៊ាន នៃ​សាកលវិទ្យាល័យ​ជាតិ​គ័ង​ស៊ី ដែលជា​សាកលវិទ្យាល័យ​ដ៏​ធំ​ប្រចាំខេត្ត​គ័ង​ស៊ី ប្រទេស​ចិន ដើម្បី​បាន​ស្វែងយល់​ពី​ខេត្ត​គ័ង​ស៊ី ដោយសារ​កម្ពុជា គឺជា​ប្រទេស​សំខាន់​នៅក្នុង​តំបន់​អាស៊ាន​។​

នៅក្នុង​កិច្ច​ទទួល​ស្វាគមន៍​ប្រតិភូ​សារព័ត៌មាន​កម្ពុជា​ល្បីឈ្មោះ​មកពី ១០​អង្គភាព លោក យី ស៊ី​អ៊ី (Ye Xingyi) ប្រធាន​វិទ្យាស្ថាន​កិច្ចការ​អាស៊ាន នៃ​សាកលវិទ្យាល័យ​ជាតិ គ័ង​ស៊ី បានលើកឡើង​អំពី​តួនាទី​ដ៏​សំខាន់​របស់​សារព័ត៌មាន ក្នុងការ​ផ្សព្វផ្សាយ​ទៅកាន់​មហាជន និង​អះអាងថា វិទ្យាស្ថាន​លោក បាន​យកចិត្តទុកដាក់​ជាមួយ​សារព័ត៌មាន​មកពី​ប្រទេស​អាស៊ាន​។ លោក​បាន​រៀបរាប់​នៃ​ប្រវត្តិ​សាកលវិទ្យាល័យ​ជាតិ​នេះ​ថា បង្កើតឡើង​កាល​ក្នុង​ឆ្នាំ​១៩៥២​ដោយមាន​វិទ្យាស្ថាន​ចំនួន​២៨​។​

លោក​បាន​បន្តថា សាកលវិទ្យាល័យ​ជាតិ គ័ង​ស៊ី គឺជា​សកល​វិទ្យាល័យ​ខ្នាត​យក្ស​លំដាប់​លេខ​២ នៅ​ខេត្ត​ក្វាង​ស៊ី ដែល​ក្នុង​១​ឆ្នាំៗ​មាន​សិស្ស​បរទេស​ខ្ទង់ពាន់​នាក់​ទៅ​សិក្សា​ចាប់ពី​ថ្នាក់​បរិញ្ញាបត្រ ដល់​បណ្ឌិត​។ ហើយ​សាកលវិទ្យាល័យ​នេះ ក៏​ធ្លាប់​បានផ្តល់​សញ្ញាបត្រ​បណ្ឌិត​កិត្តិយស​ផ្នែក​អក្សរសាស្ត្រ​ជូន​ដល់​សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា កាលពី​ឆ្នាំ​២០១៥ និង​ផ្តល់​សញ្ញាបត្រ​ដូចគ្នានេះ​ជូន​សម្តេច​កិត្តិ​ព្រឹទ្ធ​បណ្ឌិត ប៊ុន រ៉ានី​ ហ៊ុន សែន នៅ​ឆ្នាំ​២០១៧​ផងដែរ​។ លោក​បន្ថែមថា គិត​រហូតមក​ដល់ពេលនេះ វិទ្យាស្ថាន ក៏​កំពុង​សិក្សា​អំពី​ទំនាក់ទំនង​ចិន​–​អាស៊ាន ជាពិសេស​ការសិក្សា​ទំនាក់ទំនង រវាង​កម្ពុជា​–​ចិន ខណៈ​ប្រទេស​ទាំងពីរ​កំពុង​ពង្រឹង និង​ពង្រីក​កិច្ចសហប្រតិបត្តិការ​លើ​គ្រប់​វិស័យ​។​

​ជាមួយគ្នានេះ លោក ម័​រ យិន​លី ប្រធាន​កិច្ចការ​អាស៊ាន​របស់​សារព័ត៌មាន គ័ង​ស៊ី ដេលី បានលើកឡើង​អំពី​ទំនាក់ទំនង​កម្ពុជា​-​ចិន ដែលជា​ដៃគូ​យុទ្ធសាស្ត្រ​គ្រប់​ជ្រុងជ្រោយ ហើយ​កំពុង​កសាង​សហគមន៍​វាសនា​រួម​។ លោក​បានបង្ហាញ​អំពី​ប្រវត្តិ​ទំនាក់ទំនង​ការទូត​ប្រទេស​ទាំងពីរ​ដែល​បង្កើតឡើង​ដោយ​មេដឹកនាំ​កម្ពុជា​-​ចិន កាលពី​ឆ្នាំ​១៩៥៨​។​

​នៅក្នុង​ឱកាស​នោះ លោក ផ្លុ​ង វិចិត្រ អគ្គនាយក​សារព័ត៌មាន The Cambodia Commercial News និង​ជា​អគ្គនាយក​សារព័ត៌មាន ស៊ី​ស៊ីថា​ម​ស៍ ដែលជា​ប្រធាន​គណៈប្រតិភូ​សារព័ត៌មាន​កម្ពុជា បាន​ថ្លែងអំណរគុណ​ដល់​វិទ្យាស្ថាន​កិច្ចការ​អាស៊ាន ដែល​បានទទួល​ស្វាគមន៍​គណៈប្រតិភូ​សារ​ព័ត៌មាន​កម្ពុជា​។ លោក​បាន​បញ្ជាក់ថា ទស្សនកិច្ច​សារព័ត៌មាន​កម្ពុជា​នៅពេលនេះ គឺធ្វើឡើង​ដើម្បី​រឹតចំណង​មិត្តភាព និង​កិច្ចសហប្រតិបត្តិការ រវាង​សារព័ត៌មាន​ប្រទេស​ទាំងពីរ​។

​សូមបញ្ជាក់ថា អ្នកសារព័ត៌មាន​កម្ពុ​ជា ចំនួន​១៤​រូប មកពី​ស្ថាប័ន​ទូរទស្សន៍ អន​ឡាញ កាសែត ១០​អង្គភាព បាន​ចូលរួម​កម្មវិធី «​អ្នកសារព័ត៌មាន​កម្ពុ​ជា មើល​ខេត្ត​គ័ង​ស៊ី​» ប្រទេស​ចិន រយៈពេល​៦​ថ្ងៃ ចាប់ពី​ថ្ងៃទី​១៥ ដល់​២០ មិថុនា ឆ្នាំ​២០២៣​។ កម្មវិធី​នេះ រៀបចំឡើង​ដោយ​កាសែត The Commercial News និង Cambodia Guangxi Cloud ASEAN International Communication Station ដែលជា​អង្គភាព​ចំណុះ Guangxi Daily៕​