​ប្រណាំង​កង់៖ កីឡាករ​អូស្ត្រាលី Caleb Ewan បាន​ប្រជែង​ឈ្នះ​ដំណាក់កាល​ទី៥ នៃ​ការប្រកួត​ប្រណាំង​កង់ Grand Tour, Giro d’Italia​ តែ​បេក្ខភាព​ប្រជែង​ជើងឯក Mikel Landa​ មិន​អាច​បញ្ចប់​ដំណាក់​កាល​បាន​ក្រោយ​ជួប​គ្រោះថ្នាក់​។

​​ដំណាក់កាល​ទី​៥ ដែល​មាន​ចម្ងាយ​ផ្លូវ​ ១៧៧​គីឡូ​ម៉ែត្រ Caleb Ewan ដែល​ប្រណាំង​អោយ​ក្រុម Lotto Soudal​ បាន​មក​ដល់​ទី​ព្រ័ត្រ​មុនគេ​ប្រើ​ពេល ៤ម៉ោង ៧នាទី ១វិនាទី ខណៈ​លេខ២ និង​លេខ៣ សុទ្ធ​តែ​ជា​កីឡាករ​ម្ចាស់ផ្ទះ​អ៊ីតាលីគឺ Gaicomo Nizzolo ​និង Elia Viviani ស្ថិត​ក្នុង​ថេរវេលា​ដូចគ្នា​ជាមួយ​នឹង​អ្នក​លេខ​៤ Peter Sagan​។​ ​​ចំណែក​កីឡាករ​វ័យ ៣១​ឆ្នាំ​អេ​ស្ប៉ា​ញ Mikel Landa​ បាន​ជួបនឹង​គ្រោះថ្នាក់​ ដោយ​ប៉ះទង្គិច​ជាមួយ​អ្នក​ឈ្នះ​ដំណាក់កាល​ទី​៤ កីឡាករ​អាមេរិក Joe Domborowski និង​ត្រូវ​បាន​ដឹក​តាម​រថយន្ត​សង្គ្រោះ​មក​មន្ទីរពេទ្យ ក្រោយមក​ក៏​ពិនិត្យ​ឃើញ​ថា ​បាក់ឆ្អឹង​ដងកាំបិត និង​របួស​លើ​ឆ្អឹងជំនី​ផង​ដែរ​។​

​​ក្រោយ ៥​ដំណាក់កាល​នេះ​កីឡាករ​ម្ចាស់ផ្ទះ​អ៊ីតាលី Alessandro Da Marchi​ នៅតែ​ជា​អ្នក​នាំ​មុខ​គេ​ក្នុង​តារាង​រួម​ដដែល ​ដោយមាន​វេលា​នាំមុខ​លើ​អ្នក​លេខ​២ កីឡាករ​ប៊ែ​ល​ហ្ស៊ិ​ក Louis Vervaeke ៤២វិនាទី និង​នាំមុខ​លើ​អ្នក​លេខ៣ កីឡាករ​ព័រទុយហ្កាល់ Nelson Oliveira ៤៨វិនាទី​។ ​ដោយឡែក​ដំណាក់កាល​ទី៦ ថ្ងៃ​ព្រហស្បតិ៍​នេះ​មាន​ចម្ងាយ​ផ្លូវ ១៦០​គីឡូ​ម៉ែត្រ​៕

​អត្ថបទ​៖​នាង សុភា​វុ​ធ