សារព័ត៌មានហ៊ូធី រាយការណ៍កាលពីថ្ងៃពុធថា អារ៉ាប៊ីសាអូឌីត និងក្រុមអាជ្ញាធរហ៊ូធី ដែលគ្រប់គ្រងតំបន់ភាគខាងជើងប្រទេសយ៉េម៉ែន បានដោះដូរសាកសពសកម្មប្រយុទ្ធ ៦៤នាក់ គឺជាការដោះដូរលើកទី៣នៅក្នុងកិច្ចព្រមព្រៀងបែបនេះ ដែលវាគឺជាសញ្ញាចុងក្រោយមួយនៃដំណើរឆ្ពោះទៅមុខក្នុងកិច្ចប្រជុំដើម្បីបញ្ចប់ជម្លោះរយៈពេល ៨ឆ្នាំកន្លងមកនេះ ។
រូបភាពវីដេអូឃ្លីប និងការអធិប្បាយពីទូរទស្សន៍ al-Masirah គ្រប់គ្រងដោយក្រុមឧទ្ទាមហ៊ូធី ឃើញសាកសពត្រូវបានដោះដូរនៅព្រំដែនអារ៉ាប៊ីសាអូឌីត-យ៉េម៉ែន ជាទីដែលក្រុមគណៈប្រតិភូមកពីភាគីទាំង ២ បានជួបជុំគ្នាក្រោយការចរចាអស់រយៈពេលជាច្រើនសប្តាហ៍នៅក្នុងប្រទេសអារ៉ាប៊ីសាអូឌីត ។
ទោះបីជាយ៉ាងណាក៏ដោយ គេនៅមិនទាន់ដឹងច្បាស់នោះទេថាតើនៅពេលណា ការដោះដូរសាកសពនេះ ត្រូវបានធ្វើឡើង ។
គួរឲ្យដឹងថា កាលពីឆ្នាំ ២០១៥ កងកម្លាំងចម្រុះដឹកនាំដោយអារ៉ាប៊ីសាអូឌីត បានធ្វើអន្តរាគមន៍ប្រឆាំងនឹងចលនាក្រុមឧទ្ទាមហ៊ូធីគាំទ្រដោយអ៊ីរ៉ង់ ដែលបានផ្តួលរំលំរដ្ឋាភិបាលទទួលស្គាល់ដោយអន្តរជាតិរបស់យេម៉ែននៅទីក្រុង Sanaa កាលពីឆ្នាំ ២០១៥ ។
សង្គ្រាមមួយនេះ បានបំផ្លិចបំផ្លាញសេដ្ឋកិច្ចយ៉េម៉ែនទាំងស្រុង ធ្វើឲ្យមនុស្សរាប់លាននាក់ធ្លាក់ក្នុងគ្រោះអត់ឃ្លាន និងបានសម្លាប់មនុស្សរាប់ម៉ឺននាក់ ប៉ុន្តែកិច្ចពិភាក្សាដើម្បីបញ្ចប់សង្គ្រាម ទើបតែបានចាប់ផ្តើមទេ ចាប់តាំងពីទីក្រុង Riyadh និងអ៊ីរ៉ង់ បានស្តារទំនាក់ទំនងការទូតរបស់ពួកគេវិញកាលពីខែមីនា៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
