លោក Biden និយាយថា «ខ្ញុំមានជំនឿជាយូរមកហើយថា ទំនាក់ទំនងរវាងសហរដ្ឋអាមេរិក និងប្រទេសឥណ្ឌានឹងក្លាយជាទំនាក់ទំនងដ៏ច្បាស់លាស់នៃសតវត្សរ៍ទី២១នេះ»។ ប្រធានាធិបតីសហរដ្ឋអាមេរិកលោក Joe Biden កាលពីថ្ងៃព្រហស្បតិ៍បានក្រាលកម្រាលព្រំក្រហមរបស់សេតវិមានសម្រាប់នាយករដ្ឋមន្ត្រីឥណ្ឌាលោក Narendra Modi នៅក្នុងពិធីបើកដ៏មានអត្ថន័យដោយមានអ្នកស្វាគមន៍ប្រហែល ៧.០០០នាក់ចូលរួម។ បន្ទាប់ពីជំនួប នៅការិយាល័យOval មេដឹកនាំទាំងពីរបានសាទរកិច្ចព្រមព្រៀងលើវិស័យការពារជាតិ និងពាណិជ្ជកម្ម សំដៅទប់ទល់ឥទ្ធិពលជាសកលរបស់ប្រទេសចិន។ លោក Modi និយាយថា «ការសន្ទនារបស់យើងនៅថ្ងៃនេះ និងការសម្រេចចិត្តសំខាន់ៗ ដែលយើងបានធ្វើ បានបន្ថែមជំពូកថ្មីចំពោះភាពជាដៃគូយុទ្ធសាស្ត្រជាសកល និងគ្រប់ជ្រុងជ្រោយរបស់យើង។ មន្ត្រីរដ្ឋបាលលោក Biden បាននិយាយថា កិច្ចព្រមព្រៀងដ៏ទូលំទូលាយត្រូវបានបង្កើតឡើងលើបន្ទះអេឡិចត្រូនិក រ៉ែសំខាន់ៗ បច្ចេកវិទ្យា កិច្ចសហប្រតិបត្តិការអវកាស និងការពារជាតិ។ ប៉ុន្តែដំណើរទស្សនកិច្ចរបស់លោក Modi ពុំមែនគ្មានភាពចម្រូងចម្រាសនោះទេ។ ក្រុមបាតុករមួយក្រុមតូច ត្រូវបានគេឃើញធ្វើបាតុកម្មនៅជិតសេតវិមានជុំវិញ ដោយបានចោទប្រកាន់ការរើសអើងលើជនជាតិភាគតិច រួមទាំងជនមូស្លីម ដែលស្ថិតនៅក្រោមរដ្ឋាភិបាលរបស់លោក Modi ។ សន្និសីទសារព័ត៌មានរួម កាលពីថ្ងៃព្រហស្បតិ៍ គឺជាលើកដំបូងដែលលោកModiបានទទួលសំណួរក្នុងទម្រង់បែបនេះក្នុងអាណត្តិ៩ឆ្នាំរបស់លោក។
នៅពេលត្រូវបានសួរអំពីជំហានដែលលោកធ្វើដើម្បីធ្វើឲ្យប្រសើរឡើងសិទ្ធិរបស់ជនមូស្លីម និងជនជាតិភាគតិចដ៏ទៃទៀត លោក Modi បាននិយាយថា ប្រយោជន៍នៃគោលនយោបាយរបស់រដ្ឋាភិបាលឥណ្ឌា គឺអាចទទួលបានសម្រាប់មនុស្សគ្រប់គ្នា។ លោក Modi និយាយថា ពិតជាគ្មានចន្លោះសម្រាប់ការរើសអើងនោះទេ។ ហើយនៅពេលដែលអ្នកនិយាយពីលទ្ធិប្រជាធិបតេយ្យ ប្រសិនបើគ្មានតម្លៃមនុស្ស និងគ្មានមនុស្សធម៌ ក៏គ្មានសិទ្ធិមនុស្ស ហើយនោះក៏គ្មានលទ្ធិប្រជាធិបតេយ្យ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
