ប៉េតង់៖ ការប្រកួតកីឡាប៉េតង់ជ្រើសរើសជើងឯកពិភពលោកយុវជន និងស្ត្រីលើកទី១៧ ដែលកម្ពុជាទទួលបានសិទ្ធិធ្វើជាម្ចាស់ផ្ទះលើកដំបូងក្នុងប្រវត្តិសាស្ត្រ បានបើកការប្រកួតផ្លូវការហើយកាលពីល្ងាចថ្ងៃទី១៩ ខែវិច្ឆិកា ឆ្នាំ២០១៩ នៅពហុកីឡដ្ឋានជាតិ រាជធានីភ្នំពេញ។ជាមួយការប្រកួតបើកឆាកនេះ ក្រុមកីឡាការិនីកម្ពុជារួមមានកីឡាការិនី កែ ឡេង, អ៊ុក ស្រីមុំ, អ៊ុន ស្រីយ៉ា និងកីឡាការិនី កែវ សុវណ្ណា បានយកឈ្នះដាច់លើក្រុមកីឡាការិនី មកពីប្រទេសឡេតូនីដោយលទ្ធផល ១៣–៣ពិន្ទុ លើវិញ្ញាសាស្ត្រី ៣នាក់ទល់នឹង ៣នាក់។ អ្វីដែលពិសេសវីរកីឡាការិនី កែ ឡេង ក៏បានឈរចាំជុំបន្ទាប់លើវិញ្ញាសាវាយយកពិន្ទុក្រោយរកបាន ៣៨ពិន្ទុឈរកំពូលតារាងក្នុងការប្រកួតថ្ងៃដំបូងផងដែរ។ បើតាមការបញ្ជាក់របស់កីឡាករ អ៊ុន ស្រីយ៉ា តំណាងក្រុមកីឡាការិនីកម្ពុជា ក្រោយចប់ការប្រកួតបានឲ្យដឹងថា ការដណ្ដើមបានជ័យជម្នះថ្ងៃដំបូងគឺជារឿងមួយដ៏សំខាន់ សម្រាប់ធ្វើដើមទុនឆ្ពោះទៅការប្រកួតបន្ទាប់។ តែអ្វីដែលកញ្ញាចាប់អារម្មណ៍គឺក្រោយចប់ការប្រកួតភ្លាមៗ ក្រុមកីឡាការិនីប្រទេសឡេតូនីបានបង្ហាញពីអារម្មណ៍ពិតថា ពួកគេមានអារម្មណ៍ភ័យឡើងញ័រដៃតែម្ដង បន្ទាប់ពីមានអ្នកគាំទ្រច្រើនលើសពីការរំពឹងទុក ចូលរួមទស្សនាការប្រកួតបើកឆាកនេះ។យ៉ាងណាមិញទោះបីក្រុមកីឡាការិនីកម្ពុជា ធ្វើបានល្អក្នុងប្រកួតបើកឆាកវិញ្ញាសាស្ដ្រី ៣នាក់ទល់នឹង ៣នាក់ក៏ពិតមែន តែឱកាសប្រជែងមេដាយនៅឆ្ងាយនៅឡើយ ព្រោះនៅសល់ការប្រកួត និងក្រុមខ្លាំងៗជាច្រើនទៀត ដែលក្រុមកីឡាការិនីកម្ពុជាត្រូវឆ្លងកាត់ និងខំប្រឹងបន្ថែមទៀត។ ចំពោះការប្រកួតវិញ្ញាសាវាយយកពិន្ទុនារីវិញ កីឡាការិនី កែ ឡេង ម្ចាស់មេដាយមាស ៣ជំនាន់ធ្វើបានយ៉ាងល្អក្នុងប្រកួតដំបូងរបស់ខ្លួន ដោយរកបាន ៣៨ពិន្ទុ នាំមុខកីឡាការិនី Homniam Ranu របស់ប្រទេសន័រវែសឈរលេខរៀងទី២ ចំនួន ១ពិន្ទុ។ យ៉ាងណាមិញដោយសាររូបមន្ដប្រកួតបានកំណត់ កីឡាការិនីឈរកំពូលតារាង ៤រូបដែលមានពិន្ទុខ្ពស់ជាងគេ ត្រូវឡើងជុំបន្ទាប់ដោយស្វ័យប្រវត្តិដូច្នេះថ្ងៃនេះអ្នកស្រី កែ ឡេង ត្រូវសម្រាកដោយឈរចាំប្រកួតនៅជុំបន្ទាប់តែម្ដង។
គួរបញ្ជាក់ថា ការប្រកួតកីឡាប៉េតង់ជ្រើសរើសជើងឯកពិភពលោកយុវជន និងស្ត្រីលើកទី១៧ នៅកម្ពុជាគ្រោងធ្វើឡើយរយៈពេល ៥ថ្ងៃចាប់ពីថ្ងៃទី១៩ ដល់ថ្ងៃទី២៣ ខែវិច្ឆិកាខាងមុខ ដោយមានក្រុមកីឡាករ-កីឡាការិនីមកពី ៤៩ប្រទេស ក្នុងនោះមានយុវជនគឺមាន ៣០ក្រុម និងស្ត្រី ៥០ក្រុម។ លើសពីនេះក៏មានការចូលរួមសហការផ្សាយផ្ទាល់ ពីក្រុមការងារទូរទស្សន៍ BTV-News ផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
