នៅក្នុងកិច្ចប្រឹងប្រែងមួយដើម្បី «លុបបំបាត់ការអាប់ឱនកិត្តិយស ដោសារភាពអត់ឃ្លាននៅក្នុងប្រទេស កេនយ៉ា កម្មវិធីអាហារនៅក្នុងសាលារៀនដ៏ធំបំផុត ក្នុងទ្វីបអាហ្វ្រិក នឹងចាប់ផ្តើម នៅទីក្រុងណៃរ៉ូប៊ី (Nairobi) ក្នុងខែសីហាខាងមុខនេះ។

នៅក្នុងរដ្ឋធានីកេនយ៉ា សាលាបឋមសិក្សា និងមជ្ឈមណ្ឌលអភិវឌ្ឍន៍កុមារតូចៗចំនួន ២២៥កន្លែង នឹងផ្តល់អាហារប្រចាំថ្ងៃចំនួន ៤០០.០០០ចាន ដល់កុមារ ដោយផ្ទះបាយថ្មីចំនួន ១០កន្លែង ដែលឥឡូវនេះកំពុងត្រូវបានសាងសង់។ គំនិតផ្តួចផ្តើមនេះ នឹងចាប់ផ្តើមនៅថ្ងៃទី២៨ ខែសីហា ដែលជាថ្ងៃដំបូងនៃឆមាសរដូវស្លឹកឈើជ្រុះ ដោយមានការជួលបុគ្គលិកការងារចំនួន ៣.៥០០នាក់។

អង្គការ Nairobi County និង Food4Education ដែលជាអង្គការមិនរកប្រាក់កម្រៃ នៅប្រទេសកេនយ៉ា ដែលបច្ចុប្បន្នផ្តល់អាហារដល់សិស្សបឋមសិក្សាចំនួន ១៥០.០០០នាក់ នៅក្នុងទីក្រុង បានសហការគ្នាលើគម្រោងដែលមានទឹកប្រាក់ ៨,៦លានដុល្លារ។ យោងតាមអង្គការ Save The Children កង្វះអាហារូបត្ថម្ភបណ្តាលឲ្យមានការលូតលាស់មិនល្អ ក្នុងចំណោមកុមារកេនយ៉ាចំនួន ២៦ភាគរយ។

ប្រធានាធិបតីនៃប្រទេសកេនយ៉ា លោក William Ruto បាននិយាយនៅក្នុងកម្មវិធីបើកបង្ហាញគំនិតផ្ដួចផ្ដើមនេះ កាលពីថ្ងៃអង្គារថា៖ «យើងត្រូវលុបបំបាត់នូវភាពអាម៉ាស់ដោយសារភាពអត់ឃ្លាន នៅក្នុងប្រទេសរបស់យើង។ យើងនឹងត្រូវផ្ចិតផ្ចង់ និងផ្តោតលើការធានានូវជោគជ័យ ក្នុងការអនុវត្តកម្មវិធីផ្តល់អាហារដល់សាលារៀននេះ។ ភាពអាម៉ាស់ដ៏ធំបំផុត គឺការដែលកូនៗរបស់យើងទៅសាលារៀន ហើយអត់អាហារ ដោយសារខ្វះអាហារ»។

គួររំលឹកផងដែរថា អ្នកជំនាញផ្នែកចំណីអាហារជនជាតិកេនយ៉ា លោក Wawira Njiru បានបង្កើតអង្គការ Food4Education ក្នុងឆ្នាំ២០១២ ដោយចាប់ផ្ដើមពីផ្ទះបាយបណ្តោះអាសន្នតែមួយ ដែលមានមេចុងភៅតែម្នាក់ និងផ្តល់អាហារថ្ងៃត្រង់ដល់សិស្ស ២៥នាក់នៅសាលាបឋមសិក្សា Ruiru។

លើសពីនេះទៀត កិច្ចសហការរវាងអង្គការ Food4Education និងរដ្ឋបាលស្រុកណៃរ៉ូប៊ី (Nairobi) នឹងផ្តល់ឲ្យកសិករនូវទីផ្សារ និងឱកាសទទួលបានការងារ៕