ប្រមុខការទូតរបស់សហភាពអឺរ៉ុប បានអំពាវនាវឲ្យរៀបចំការបោះឆ្នោតនៅតំបន់ភាគខាងជើងកូសូវ៉ូ ដើម្បីបន្ធូរបន្ថយភាពតានតឹង ក្រោយមានជំនួបដាច់ដោយឡែកពីគ្នាជាមួយក្រុមមេដឹកនាំស៊ែរប៊ី និងកូសូវ៉ូ កាលពីថ្ងៃព្រហស្បតិ៍ ។  

តំបន់ភាគខាងជើងកូសូវ៉ូ ដែលរស់នៅភាគច្រើនដោយជនជាតិដើមស៊ែរប៊ី បានមើលឃើញភាពតានតឹងដ៏អាក្រក់បំផុត ចាប់តាំងពីប្រទេសមួយនេះ ប្រកាសឯករាជ្យពីស៊ែរប៊ី កាលពីឆ្នាំ ២០០៨ ។ 

អំពើហិង្សា បានផ្ទុះឡើងកាលពីខែមុន ក្រោយក្រុមអភិបាលក្រុងជនជាតិដើមអាល់បានី ឡើងកាន់អំណាច បន្ទាប់ពីការបោះឆ្នោតថ្នាក់មូលដ្ឋាន ដែលមានប្រជាពលរដ្ឋចូលរួមត្រឹមតែ ៣,៥ភាគរយប៉ុណ្ណោះ ពោលគឺបន្ទាប់ពីស៊ែរប៊ី ដែលមានពលរដ្ឋភាគច្រើនរស់នៅក្នុងតំបន់នោះ ធ្វើពហិការការបោះឆ្នោត ។  

លោក Josep Borrellប្រមុខការទូតរបស់សហភាពអឺរ៉ុប និយាយថា ការបោះឆ្នោត គឺជាស្នូលនៃបញ្ហា និងជាស្នូលនៃដំណោះស្រាយ ហេតុដូច្នេះហើយការចូលរួមពេញលេញដោយប្រជាពលរដ្ឋរស់នៅក្នុងទីក្រុងទាំង ៤ គឺជាការចំាបាច់បំផុត ។  

លោកបន្តថា កូសូវ៉ូ និងស៊ែរប៊ី ស្ថិតលើវិថីល្អដើម្បីធ្វើឲ្យទំនាក់ទំនងរបស់ពួកគេមានលក្ខណៈធម្មតាវិញ គឺជាជំហានដ៏ចំាបាច់សម្រាប់ប្រទេសទាំង ២ ដែលចង់ក្លាយជាសមាជិកសហភាពអឺរ៉ុប ហើយលោកបានជំរុញឲ្យពួកគេវិលត្រឡប់មករកការសន្ទនាដែលសម្របសម្រួលដោយសហភាពអឺរ៉ុប ៕