ភ្នំពេញ ៖ ក្រុមប្រឹក្សាអភិវឌ្ឍន៍កម្ពុជា សហការជាមួយវេទិកាសេដ្ឋកិច្ចពិភពលោក (World Economic Forum) នៅថ្ងៃទី១២ ខែឧសភា ឆ្នាំ២០២១នេះ បានដាក់ឲ្យដំណើរការនូវប្រព័ន្ធទិន្នន័យ ស្តីពីសន្ធានកម្មខ្សែច្រវាក់ផ្គត់ផ្គង់សំដៅ ផ្តល់កិច្ចសម្រួលវិនិយោគ សម្រាប់អភិវឌ្ឍន៍ចីរភាព ដើម្បីផ្ដល់ព័ត៌មានស្ដីពីប្រតិបត្តិការប្រកបដោយនិរន្តរភាពនៃក្រុមហ៊ុនក្នុងស្រុក និងបម្រើជាវេទិកាដ៏សំខាន់មួយក្នុងការតភ្ជាប់ទំនាក់ទំនងរវាងក្រុមហ៊ុនបរទេស និងក្រុមហ៊ុនក្នុងស្រុក អាចស្វែងរកភាពជាដៃគូណាមួយ ឬការធ្វើការវិនិយោគនៅក្នុងប្រទេសកម្ពុជាបាន។
ឯកឧត្តម សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការក្រុមប្រឹក្សាអភិវឌ្ឍន៍កម្ពុជា បានលើកឡើងនៅក្នុងវេទិកាសេដ្ឋកិច្ចពិភពលោក (World Economic Forum) នៃការរៀបចំពិធីដាក់ឱ្យដំណើរការនូវប្រព័ន្ធទិន្នន័យ ស្តីពីសន្ទានកម្មខ្សែច្រវាក់ផ្គត់ផ្គង់សំដៅផ្តល់កិច្ចសម្រួលវិនិយោគ សម្រាប់អភិវឌ្ឍន៍ចីរភាព តាមប្រព័ន្ធវីដេអូ នៅថ្ងៃទី១២ ខែឧសភា ថា ប្រព័ន្ធទិន្នន័យនេះមានសារៈសំខាន់ណាស់ ដើម្បីផ្តល់នូវថ្នាលបច្ចេកវិទ្យាព័ត៌មានសម្រាប់សម្រួលដល់ការធ្វើសន្ទានកម្ម ខ្សែច្រវាក់ផ្គត់ផ្គង់ រវាងអ្នកផ្គត់ផ្គង់ក្នុងស្រុក និងអ្នកវិនិយោគ ដោយផ្តោតលើការផ្តល់កិច្ចសម្រួលវិនិយោគសម្រាប់អភិវឌ្ឍន៍ចីរភាព ។
ឯកឧត្តមរដ្ឋមន្ត្រីប្រតិភូ បានស្នើសុំឱ្យតួអង្គពាក់ព័ន្ធទាំងអស់ចូលរួមប្រើប្រាស់ប្រព័ន្ធទិន្នន័យនេះឱ្យបានទូលំទូលាយ និងសង្ឃឹមយ៉ាងមុតមាំថា អ្នកវិនិយោគ និងក្រុមហ៊ុនបរទេស នឹងមើលឃើញថា កម្ពុជាកំពុងបង្កើតនូវបរិស្ថានវិនិយោគ ដែលស្វាគមន៍វត្តមានរបស់ពួកគេ ខណៈកម្ពុជាបានខិតខំជំរុញការវិនិយោគ ដែលមានទង្វើធុរកិច្ចប្រកបដោយការទទួលខុសត្រូវ និងមានចីរភាព។
លោកបណ្ឌិត ម៉ាធូ ស្តេហ្វិនសុន (Matthew Stephenson) នាយកគោលនយោបាយ និងសហគមន៍នៃនាយកដ្ឋានវិនិយោគ និងពាណិជ្ជកម្មអន្តរជាតិ ថ្លែងថា ក្រុមហ៊ុនបរទេសដែលស្វែងរកការវិនិយោគ អនុលោមតាមគោលការណ៍បរិស្ថាន, សង្គម, និងអភិបាលកិច្ច អាចដាក់ការវិនិយោគនៅកម្ពុជា ជាមួយក្រុមហ៊ុនក្នុងស្រុក ដែលកំពុងប្រតិបត្តិការប្រកបដោយចីរភាព ហើយក្រុមហ៊ុនកម្ពុជាដទៃទៀត អាចបង្វែរការតម្រង់ទិសប្រតិបត្តិការធុរកិច្ចរបស់ខ្លួន ទៅរកការអភិវឌ្ឍប្រកបដោយចីរភាពកាន់តែច្រើនទៀត ដើម្បីទាក់ទាញការធ្វើធុរៈកិច្ច រួមគ្នាជាមួយនឹងក្រុមហ៊ុនបរទេស សំដៅលើកកម្ពស់ការធ្វើសន្ទានកម្មខ្សែច្រវាក់ផ្គត់ផ្គង់តំបន់ និងសកលលោក។
ការជ្រើសរើសកម្ពុជា ជាដៃគូពិភាក្សារបស់វេទិកាសេដ្ឋកិច្ចពិភពលោក លើការផ្តល់កិច្ចសម្រួលវិនិយោគសម្រាប់ការអភិវឌ្ឍប្រកបដោយចីរភាព គឺឈរលើមូលដ្ឋានរឹងមាំរបស់កម្ពុជា ដែលមានគោលនយោបាយបើកចំហរដ៏ប្រសើរចំពោះការវិនិយោគ។
វេទិកាសេដ្ឋកិច្ចពិភពលោកនិងកម្ពុជា បានធ្វើការរួមគ្នាដើម្បីចែករំលែកនូវរបកគំហើញ និងឧត្តម្មានុវត្តស្តីពីការផ្តល់កិច្ចសម្រួលវិនិយោគ ជាពិសេសដំណើរការនៃការរៀបចំប្រព័ន្ធទិន្នន័យស្តីពីសន្ធានកម្មខ្សែច្រវាក់ផ្គត់ផ្គង់ សំដៅផ្តល់កិច្ចសម្រួលវិនិយោគសម្រាប់អភិវឌ្ឍន៍ចីរភាពជាមួយប្រទេសដទៃទៀតក្នុងក្របខណ្ឌអង្គការពាណិជ្ជកម្មពិភពលោក និងក្របខណ្ឌតំបន់ដទៃទៀត។
សូមបញ្ជាក់ថា កាលពីឆ្នាំ ២០១៩ ការអនុម័តគម្រោងវិនិយោគដោយ ក្រុមប្រឹក្សាអភិវឌ្ឍន៍កម្ពុជា បានកត់ត្រា ៩,៤០ ពាន់លានដុល្លារអាមេរិកក្នុងចំណោមនោះប្រទេសចិន បានវិនិយោគ ២,៧៥ ពាន់លានដុល្លារអាមេរិក បន្ទាប់មកទីក្រុងហុងកុង ៩១២,៥៥ លានដុល្លារអាមេរិក និងជប៉ុន ២៩៨,៨៤ លានដុល្លារ៕
អត្ថបទ ៖ សុន រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
