ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានបន្តអញ្ជើញចុះជួបសំណេះសំណាលជាមួយកម្មករ-កម្មការិនី ចំនួន១៩,០០៤នាក់ មកពីរោងចក្រសហគ្រាចំនួន១៣ នៅរាជធានីភ្នំពេញ និងខេត្តកណ្ដាល ដែលជំនួបសំណេះ សំណាល ធ្វើឡើងនៅពហុកីឡដ្ឋានជាតិមរតកតេជោ នៅព្រឹកថ្ងៃទី២៤ ខែមិថុនា ឆ្នាំ២០២៣នេះ។

ប្រសាសន៍សំខាន់ៗរបស់សម្តេចតេជោ ហ៊ុន សែន ដែលមានខ្លឹមសារដូចខាងក្រោម៖

​- សម្តេចតេជោ ហ៊ុន សែន បានសម្តែងក្តីរីករាយដែលបានមកជួបក្មួយៗកម្មករ-កម្មការិនីរោងចក្រ នាព្រឹកនេះ ដែលមួយចំនួនមកពីខេត្តកណ្តាល និងមួយចំនួនទៀតមកពីរាជធានីភ្នំពេញ។

- សម្តេចតេជោ ហ៊ុន សែន បានប្រកាសថា គោលនយោបាយគាំពារកម្មករ-កម្មការិនី រួមទាំងកម្រិតប្រាក់បៀវត្សរ៍ គឺជាការគិតគូរយ៉ាងដិតដល់របស់រាជរដ្ឋាភិបាល ដែលកើតចេញពីគណបក្សប្រជាជនកម្ពុជា ដែលមិនមែន​ជារឿងចៃដន្យទេ។

- សម្តេចតេជោ ហ៊ុន សែន ប្រកាសនៅឆ្នាំ២០២១-២០២៣ ក្នុងពេលវិបត្តិកូវីដ-១៩ធ្ងន់ធ្ងរ រាជរដ្ឋាភិបាលមិន​បានដំឡើងប្រាក់បៀវត្សរ៍ដល់មន្ត្រីរាជការកងកម្លាំងប្រដាប់អាវុធឡើយ ដោយសាររដ្ឋត្រូវយកចំណែកទាំងនោះ ទៅទប់ទល់នឹងហានិភ័យសង្គមបណ្តាលមកពីកូវីដ-១៩ តែរដ្ឋាភិបាលបានប្រឹងប្រែង​មិនឱ្យឡើងថ្លៃនូវ​មុខទំនិញសមសារពើ និងសេវាចាំបាច់របស់ប្រជាពលរដ្ឋដូចជា៖ ទឹក ភ្លើងជាដើម។

- សម្ដេចតេជោ ហ៊ុន សែន បន្តបញ្ជាក់ថា ការចុះជួបកម្មករនិយោជិតនេះ គឺដើម្បីស្វែងយល់ពីកិច្ចការ ដែល​រាជរដ្ឋាភិបាលបានដាក់ចេញ ដើម្បីគាំពារកម្មករនិយោជិតថា តើសម្រេចបានដល់កម្រិតណាខ្លះ?។

- សម្តេចតេជោ ហ៊ុន សែន បានបញ្ជាក់ថា រាជរដ្ឋាភិបាលបានបង្កលក្ខណៈងាយស្រួលយ៉ាងខ្លាំងដល់ថៅកែរោងចក្រ តាមរយៈការប្រើប្រាស់រូបីយប័ណ្ណអន្តរជាតិ ដើម្បីបើកប្រាក់ខែជូនកម្មករបាន ដែលជាផ្នែកជួយសម្រួលការងារ និងនិរន្តរភាព នៃអត្រាប្តូរប្រាក់ផងដែរ។

- សម្តេចតេជោ ហ៊ុន សែន បានបញ្ជាក់ថា មានជនចង្រៃមួយក្រុម ដែលកំពុងមានទោសក្បត់ជាតិកម្ពុជាផងនោះ បានដើរអំពាវនាវដល់អន្តរជាតិ កុំមកបណ្តាក់ទុនរកស៊ីនៅកម្ពុជា, កុំទិញទំនិញពីកម្ពុជា និងត្រូវដាក់ទណ្ឌកម្ម​កម្ពុជាជាដើម...[] ដែលនៅលើពិភពលោកនេះ គ្មានក្រុមប្រឆាំងណា ដូចក្រុមប្រឆាំងនៅកម្ពុជាឡើយ។

- សម្តេចតេជោ ហ៊ុន សែន មានប្រសាសន៍ថា កត្តាសុខសន្តិភាព គឹជាការចាប់ផ្តើមដំបូង នៃការអភិវឌ្ឍ និងសកម្មភាពផ្សេងៗទៀត នៃវឌ្ឍនភាព រួមទាំងកំណើនការងារសម្រាប់កម្មករ-កម្មការិនីផងដែរ។ សម្តេចតេជោ ហ៊ុន សែន បញ្ជាក់ថា «បើគ្មានសុខសន្តិភាពទេ កុំនិយាយ ឬគិតអ្វីទាំងអស់ គិតត្រឹមតែធ្វើយ៉ាងម៉េច​រត់ចូល​ត្រង់សេឱ្យបានតែប៉ុណ្ណោះឯង...[]»។

- សម្តេចតេជោ ហ៊ុន សែន បានរំលឹកជាថ្មីទៀតថា បើកម្ពុជាមានសង្រ្គាម គ្មានបរទេសណាមកធ្វើ​ការវិនិយោគ​ជាមួយកម្ពុជានោះទេ ដូច្នេះហើយបងប្អូនជនរួមជាតិទាំងអស់ត្រូវថែរក្សានូវសុខសន្តិភាពនេះឲ្យខាងតែបាន។

- សម្តេចតេជោ ហ៊ុន សែន បានប្រកាសមិនលើកលែងចំពោះជនណា ឬក្រុមប្រឆាំងណា ដែលមានបំណងបង្កការរំខាន អុកឡុក ឬធ្វើសកម្មភាពផ្សេងៗ ដើម្បីបំផ្លាញសុខសន្តិភាពនៅកម្ពុជា។

- សម្តេចតេជោ ហ៊ុន សែន បន្តអំពាវនាវដល់ម្ចាស់រោចក្រ និងកម្មករនិយោជិត ត្រូវរួមគ្នាធ្វើយ៉ាងណាឱ្យរោងចក្រមួយក្លាយទៅជាសហគមន៍សុខសាន្តមួយ។ ការធ្វើបែបនេះបាន កម្មករនិយោជិត និងម្ចាស់រោងចក្រ ត្រូវធ្វើបែបណា កុំឱ្យមានគ្រឿងញៀន កុំឱ្យមានបងតូច បងធំ កុំឱ្យមានជម្លោះរវាង​កម្មករនិយោជិត និងថៅកែរោងចក្រ និងកុំឱ្យក្លាយជាកន្លែងឆ្លងរីករាលដាលជំងឺអេដស៍។

- សម្តេចតេជោ ហ៊ុន សែន បានជំរុញ និងលើកទឹកចិត្ត ឱ្យមានការដោះស្រាយបញ្ហា​នានានៅរោងចក្រ​សហគ្រាសនៅនឹងមូលដ្ឋានតែម្តង ដោយមិនត្រូវរង់ចាំតែថ្នាក់ជាតិមកជួយដោះស្រាយឡើយ និងត្រូវធ្វើការដោះស្រាយឱ្យបានលឿនរហ័ស។

- សម្តេចតេជោ ហ៊ុន សែន បានលើកជាចំណោទចំពោះបញ្ហាកូដកម្មរបស់ក្រុមមួយក្តាប់តូច នៃបុគ្គលិកកម្មករក្រុមហ៊ុនណាហ្គាវើល ដែលអត់ការងារធ្វើរយៈពេលជាង២ឆ្នាំហើយ តែនៅមានលុយដើម្បីមកធ្វើកូដកម្មប្រឆាំងនឹងថៅកែថែមទៀត។ សម្តេចបញ្ជាក់ថា «ខ្ញុំមិនខ្វល់រឿងការធ្វើកូដកម្មណាហ្គាវើលនេះទេ ព្រោះខ្ញុំដឹងថា មានអ្វីនៅពីក្រោយរឿងកូដកម្មនេះ...[]».

- សម្តេចតេជោ ហ៊ុន សែន ប្រកាសថា សម្តេចមិនខ្លាចចំពោះការបាត់បង់មនុស្សប៉ុន្មាននាក់ ដើម្បីការពារ​បងប្អូនប្រជាពលរដ្ឋជាង១៧លាននាក់នោះទេ ខណៈដែលក្រុមចង្រៃទាំង​នោះនៅតែ​ចិញ្ចឹមចិត្តចង់បំផ្លិតបំផ្លាញសុខសន្តិភាពនៅកម្ពុជា។

- សម្តេចតេជោ ហ៊ុន សែន បានបញ្ជាក់ថា ដរាបណាសង្គ្រាមរុស្ស៊ី-អ៊ុយក្រែន មិនទាន់ចប់ សេដ្ឋកិច្ចពិភពលោកនៅតែគំរាមកំហែង។ ក្នុងនោះសេដ្ឋកិច្ចកម្ពុជា ក៏រងផលប៉ះពាល់ផងដែរ ដោយសារការបញ្ជាទិញក្នុងវិស័យកាត់ដេរបានធ្លាក់ចុះ និងកត្តាវត្ថុធាតុដើម។

- មូលនិធិជាតិជំនួយសង្គម ប្រកាសបើកផ្តល់ប្រាក់របបសន្តិសុខសង្គមជូនអតីតយុទ្ធជន អតីតមន្ត្រីរាជការស៊ីវិល និងអ្នកនៅក្នុងបន្ទុក»លើកទី២ ប្រចាំខែមិថុនា ឆ្នាំ២០២៣ នៅថ្ងៃទី២៦ ខែមិថុនា ឆ្នាំ២០២៣ ចាប់ពីម៉ោង ២:០០រសៀលតទៅ។

- សម្តេចតេជោ ហ៊ុន សែន បានប្រកាសថា និន្មាការ នៃការចម្លងមេរោគអេដស៍មានការកើនឡើងនៅឆ្នាំ២០២២ ខណៈដែលក្រុមគោល ដែលមានការចម្លងច្រើនជាងគេ គឺក្រុមដែលមាននិន្នាការស្រលាញ់ភេទដូចគ្នា ក្នុងនោះគឺ ក្រុមបុរសស្រលាញ់បុរសដូចគ្នា។

- សម្តេចេតេជោ ហ៊ុន សែន បានអំពាវនាវកុំឱ្យភ្លើតភ្លើនភ្លេចខ្លួនក្នុងវិធានការការពារជំងឺអេដស៍។ សម្តេច ក៏បានអំពាវនាវកុំឱ្យរើសអើងអ្នកផ្ទុកមេរោគអេដស៍ផងដែរ។