អុីស្រាអែល ៖​ អ្នកតាំងលំនៅជនជាតិអ៊ីស្រាអែល បានសាងសង់ប៉ុស្តិ៍ជួរមុខថ្មីជាច្រើនកន្លែងនៅតំបន់គ្រប់គ្រង West Bankដោយបង្ហាញការ​ពន្លឿន​ការ​ពង្រីកការតាំងទីលំនៅឋានក្នុង​ពេល​មានអំពើហិង្សាកើនឡើង និងប្រឆាំង​ការអំពាវនាវ​ជាអន្តរជាតិឱ្យបញ្ឈប់ផែនការបែបនេះ។ យោធាអ៊ីស្រាអែលបាននិយាយនៅក្នុងសេចក្តីថ្លែងការណ៍ថា ប៉ុស្តិ៍ជួរមុខ​ជាច្រើនកន្លែង​ដែលមិនត្រូវបានអនុញ្ញាតដោយមន្ត្រីអ៊ីស្រាអែល ត្រូវបានរកឃើញនៅទូទាំងតំបន់ West Bank ចាប់តាំងពីថ្ងៃព្រហស្បតិ៍។ ពួកគេនឹងត្រូវបានរុះរើ ដោយយោងទៅតាមអាទិភាពនៃការអនុវត្ត។ ប្រទេសភាគច្រើន បានចាត់ទុកការតាំង​ទីលំនៅរបស់​ជនជាតិជ្វីហ្វដែលបានសាងសង់នៅលើ​ទឹកដីដែលអ៊ីស្រាអែល​បានចូលកាន់​កាប់នៅក្នុងសង្គ្រាមមជ្ឈិមបូព៌ាឆ្នាំ ១៩៦៧ ថាខុសច្បាប់។ ការពង្រីករបស់ពួកគេកើតមានជាច្រើនទសវត្សរ៍មកហើយ គឺជាបញ្ហាដ៏​ចម្រូងចម្រាសបំផុតរវាងអ៊ីស្រាអែល សហគមន៍អន្តរជាតិ និងប៉ាឡេស្ទីន ដែលបាននិយាយថាពួកគេធ្វើ​ឱ្យអន្តរាយដល់​អនាគតរដ្ឋប៉ាឡេស្ទីនដែលអាចទទួលបាន។ ការសាងសង់ថ្មីនេះធ្វើឡើងបន្ទាប់ពីការប្រកាសកាលពីថ្ងៃពុធដោយនាយករដ្ឋមន្ត្រីលោក Benjamin Netanyahu អំពីផែនការសម្រាប់លំនៅឋានថ្មីចំនួន ១.០០០ខ្នង នៅក្នុងការតាំងទីលំនៅតំបន់ Eli ជាការឆ្លើយតប​ទៅនឹងការ​វាយប្រហារ​ដោយកាំភ្លើងរបស់ជនប៉ាឡេស្ទីននៅក្នុងតំបន់ដែលបានបណ្តាលឲ្យជនជាតិអ៊ីស្រាអែលបួននាក់ស្លាប់។ ពលរដ្ឋប៉ាឡេស្ទីន នៅក្នុងតំបន់និយាយថា ពួកគេត្រូវបានគេដកហូតយកដីរបស់ពួកគេ ដើម្បីអនុញ្ញាតឱ្យមានការពង្រីក​ការតាំងទីលំនៅ​ឋានក្នុងរយៈពេលជាច្រើនឆ្នាំមកហើយ។ កាលពីថ្ងៃសុក្រ ស្នងការជាន់ខ្ពស់អង្គការសហប្រជាជាតិ​ទទួលបន្ទុកសិទ្ធិមនុស្ស បាននិយាយថា អំពើហឹង្សានៅតំបន់ West Bank «ជាហានិភ័យកើនឡើងហួសពីការគ្រប់គ្រង» ហើយបានអំពាវនាវឱ្យអ៊ីស្រាអែលអនុវត្តសកម្មភាព​របស់ខ្លួនស្របទៅតាមច្បាប់អន្តរជាតិ។ ក្រសួងការបរទេសប៉ាឡេស្ទីន បានថ្កោលទោសគម្រោងការតាំងលំនៅឋានថ្មីរបស់អ៊ីស្រាអែល​ដែលប្រទេសនេះ​បាននិយាយ​ថា​​ជាផ្នែក​មួយនៃផែនការរបស់ខ្លួនក្នុងការដាក់បញ្ចូលជាឧបសម្ព័ន្ធជាក់ស្តែង តំបន់ West Bank ។