អុយក្រែន ៖ ប្រទេសអ៊ុយក្រែន បានផ្តល់សញ្ញា កាលពីថ្ងៃសុក្រ (ទី២៣ ខែមិថុនា) ថា កម្លាំងជំរុញដ៏សំខាន់ នៅក្នុងយុទ្ធនាការវាយលុករបស់ខ្លួន ប្រឆាំងទល់នឹងកងកម្លាំងរុស្ស៊ី មិនទាន់លេចរូបរាងនៅឡើយទេ ដោយកងទ័ព​មួយចំនួនមិនទាន់ត្រូវបានដាក់ពង្រាយ ហើយប្រតិបត្តិការរហូតមកដល់ពេលនេះ ត្រឹមតែមានបំណង «បង្កើតសមរភូមិប្រយុទ្ធ» ប៉ុណ្ណោះ។

ហើយឧត្តមសេនីយ៍ម្នាក់ ក្នុងចំណោមឧត្តមសេនីយ៍ជាន់ខ្ពស់របស់ប្រទេសអ៊ុយក្រែន បានរាយការណ៍ពី «ជោគជ័យជាក់ស្តែង» ក្នុងការរុលទៅមុខ នៅភាគខាងត្បូង ដែលជាប្រតិបត្តិការប្រយុទ្ធមួយ ក្នុងចំណោម​ប្រតិបត្តិការប្រយុទ្ធសំខាន់ពីរ រួមជាមួយនឹងការរុលទៅមុខ នៅភាគខាងកើតអ៊ុយក្រែនផងដែរ។

អ៊ុយក្រែននិយាយថា ខ្លួនវាយដណ្តើមបានភូមិចំនួន៨ មកវិញ សម្រាប់ដំណាក់កាល​ដំបូងនៃការវាយ​បកប្រកប​ដោយមហិច្ឆតាធំបំផុតរបស់ខ្លួន ចាប់តាំងពីមានការវាយលុកទាំងស្រុងរបស់ប្រទេសរុស្ស៊ីកាលពី ១៦ខែមុន ប៉ុន្តែប្រធានាធិបតីអ៊ុយក្រែន លោក Volodymyr Zelenskiy បាននិយាយនៅសប្តាហ៍នេះថា ការទទួលបានជោគជ័យ គឺ «យឺតជាងការចង់បាន»។

ដោយលើកបង្ហាញពីល្បឿននៃភាពរីកចម្រើនរបស់អ៊ុយក្រែន មន្ត្រីជាន់ខ្ពស់ ៣នាក់ កាលពីថ្ងៃសុក្រ (ទី២៣ ខែមិថុនា) បានបញ្ជូនសញ្ញាយ៉ាងច្បាស់លាស់បំផុតរហូតមកដល់ពេលនេះថា ផ្នែកសំខាន់នៃការវាយបក មិនទាន់បានចាប់ផ្តើម​នៅឡើយទេ ដោយទីប្រឹក្សាប្រធានាធិបតីលោក Mykhailo Podolyak បានឲ្យដឹងនៅលើបណ្ដាញសង្គម Twitter ថា៖ «ប្រតិបត្តិការវាយលុករបស់កងកម្លាំងប្រដាប់អាវុធអ៊ុយក្រែន នៅតែបន្តនៅក្នុងតំបន់មួយចំនួន។ ប្រតិបត្តិបង្កើត កំពុងប្រព្រឹត្តទៅ ដើម្បីបង្កើតសមរភូមិប្រយុទ្ធ»៕