ទុយនីសុី ៖ អង្គការទេសន្តរប្រវេសន៍អន្តរជាតិ(IOM)បាននិយាយកាលពីថ្ងៃសុក្រ ដោយដកស្រង់ការរៀបរាប់របស់អ្នក​នៅរស់ចំនួន ៤នាក់ ពីហតុការណ៍លិចទូកថា ជនអន្តោប្រវេសន៍ ៣៧នាក់ កំពុងបាត់ខ្លួន បន្ទាប់ពីទូករបស់ពួក​គេបានលិចនៅចន្លោះប្រទេសទុយនីស៊ី និងកោះ Lampedusa របស់ប្រទេសអ៊ីតាលី។

ទីភ្នាក់ងារអង្គការសហប្រជាជាតិ បាននិយាយថាអ្នកនៅរស់រានមានជីវិតទាំងអស់មកពីអនុតំបន់សាហារ៉ា អាហ្រ្វិក ដែលបានមកដល់កោះ Lampedusa កាលពីល្ងាចថ្ងៃព្រហស្បតិ៍ ដោយត្រូវបានជួយសង្គ្រោះដោយនាវា​មួយគ្រឿងផ្សេងទៀត។ អ្នកនៅរស់រានមានជីវិតបានប្រាប់អង្គការ IOM ថាពួកគេបានចាកចេញពីកំពង់ផែ Sfax ប្រទេសទុយនីស៊ី ឆ្ពោះទៅកាន់ប្រទេសអ៊ីតាលី ដោយមនុស្ស៤៦នាក់ នៅលើទូក ប៉ុន្តែទូករបស់ពួកគេ បានក្រឡាប់លិចដោយខ្យល់បក់ខ្លាំង។

យោងរតាមអ្នកនាំពាក្យទីភ្នាក់ងារ IOM នៅក្នុងប្រទេសអ៊ីតាលី បានប្រាប់សារព័ត៌មានរ៉យទ័រថា ជនអន្តោប្រវេសន៍​បានរៀបរាប់ថា អ្នករួមដំណើររបស់ពួកគេចំនួន៥នាក់ត្រូវបានជួសង្គ្រោះដោយទូកមួយគ្រឿងផ្សេងទៀត ខណៈ៣៧នាក់ កំពុងបាត់ខ្លួន និងត្រូវបានគេគិតថា បានស្លាប់ ក្នុងនោះរួមមានស្ត្រី ៧នាក់ និងកុមារម្នាក់។ ដំបូង គណៈកម្មាធិការជាន់ខ្ពស់ទទួលបន្ទុកជនភៀសខ្លួនរបស់អង្គការសហប្រជាជាតិ បានផ្តល់រឿងរ៉ាវស្រដៀងគ្នាអំពី​ឧបទ្ទវហេតុនេះ ប៉ុន្តែបាននិយាយថា មនុស្ស ៤០ នាក់ត្រូវបានគេជឿថា បានបាត់ខ្លួន ពុំមែនត្រឹមតែ ៣៧នាក់នោះទេ។

មានការកើនឡើងនៃការធ្វើអន្តោប្រវេសន៍ឆ្លងកាត់សមុទ្រមេឌីទែរ៉ាណេពីប្រទេសទុយនីស៊ី នៅឆ្នាំនេះបន្ទាប់​ពីការបង្រ្កាបដោយប្រទេសទុយនីស៊ី លើជនអន្តោប្រវេសន៍មកពីអនុតំបន់សាហារ៉ាអាហ្រ្វិក ដែលរស់នៅ​ក្នុងប្រទេសដោយខុសច្បាប់ និងមានការរាយការណ៍អំពីការវាយ​ប្រហារដែលប្រកាន់ពូជសាសន៍ក្នុង​ពេលមាន​វិបត្តិសេដ្ឋកិច្ច។ មន្ត្រីតុលាការបាននិយាយកាលពីថ្ងៃព្រហស្បតិ៍ថា យ៉ាងហោចណាស់អន្តោ​ប្រវេសន៍​អាហ្វ្រិក១២ នាក់បានបាត់ខ្លួន និង៣ នាក់បានស្លាប់បន្ទាប់ពីទូក៣គ្រឿង បានលិចនៅជិតប្រទេសទុយនីស៊ី ខណៈឆ្មាំឆ្នេរ​របស់ប្រទេសនេះបានជួយសង្គ្រោះមនុស្ស ១៥២នាក់ផ្សេងទៀត៕