ស៊ីរី ៖ ទីភ្នាក់ងារសារព័ត៌មានរដ្ឋស៊ីរី Sana បានរាយការណ៍ថា ការវាយប្រហារដោយយានដ្រូន បានដាក់គោលដៅ​លើទីក្រុង Qardaha ដែលជាក្រុងនៃបុព្វបុរសរបស់ប្រធានាធិបតីស៊ីរី លោក Bashar al-Assad កាលពីថ្ងៃសុក្រ (ទី២៣ ខែមិថុនា) ដោយបានបាញ់គ្រាប់មីស៊ីលចំនួន ២គ្រាប់ ដែលបានសម្លាប់មនុស្សម្នាក់ និងធ្វើឲ្យម្នាក់ទៀត​រងរបួស​ស្រាល។

ការវាយប្រហារនេះ បានកើតឡើងមួយថ្ងៃបន្ទាប់ពីទីភ្នាក់ងារសារព័ត៌មាន Sana បានរាយការណ៍ពីការវាយប្រហារ​ដោយយានដ្រូនទៅលើទីក្រុង Salhab ដែលជាទីក្រុងកាន់កាប់ដោយរដ្ឋាភិបាលមួយផ្សេងទៀត នៅភាគ​ពាយព្យនៃប្រទេសស៊ីរី ក្បែរទឹកដីរបស់ក្រុមឧទ្ទាម ដែលការវាយប្រហារនោះ បានសម្លាប់ស្ត្រីម្នាក់ និងកុមារម្នាក់។

ការវាយប្រហារលើទីក្រុង Qardaha និង Salhab ដែលមានចម្ងាយប្រហែល ៣៥គីឡូម៉ែត្រ បានកើតឡើង​ចំពេលមានការផ្ទុះឡើងនូវការប្រយុទ្ធគ្នា នៅភាគពាយព្យជាមួយនឹងការបាញ់ផ្លោងដាក់គ្នា រវាងកងកម្លាំងរដ្ឋាភិបាល​ស៊ីរី និងក្រុមឧទ្ទាម នៅខ្សែត្រៀមជួរមុខមួយចំនួន។

ទីក្រុង Qardaha មានចម្ងាយប្រហែល ១០គីឡូម៉ែត្រ ពីមូលដ្ឋានអាកាស Hmeimim របស់ប្រទេសរុស្ស៊ី។ ក្រុមប្រឆាំងរបស់ប្រទេសស៊ីរី បាននិយាយថា យន្ដហោះចម្បាំងរបស់រុស្ស៊ី បានកំណត់គោលដៅវាយប្រហារ​លើ​តំបន់កាន់កាប់ដោយក្រុមឧទ្ទាមនាពេលថ្មីៗនេះ ហើយយោងតាមប្រភពពីភាគីទាំងពីរ កងកម្លាំងរដ្ឋាភិបាលស៊ីរី បានបង្កើនការដាក់ពង្រាយ នៅខ្សែត្រៀមជួរមុខមួយចំនួន៕