តាកែវ៖អគារមណ្ឌលសុខភាពថ្មី ត្រូវបានសម្ពោធដាក់ឲ្យប្រើប្រាស់ជាសាធារណៈ នៅក្នុងមណ្ឌលសុខភាព ចារ ស្ថិតនៅភូមិអង្គស្វាយចេក ឃុំចារ ស្រុកព្រៃកប្បាស ខេត្តតាកែវ ក្រោមអធិបតីភាព ឯកឧត្តមបណ្ឌិត ពេជ សោភ័ន រដ្ឋមន្រ្តីប្រតិភូអមនាយករដ្ឋមន្រ្តី រដ្ឋលេខាធិការប្រចាំការ ក្រសួងការងារ និងបណ្តុះបណ្តាលវីជ្ជាជីវៈ និងជាសហប្រធាន​ក្រុមការងារ​រាជរដ្ឋាភិបាលចុះមូលដ្ឋានស្រុកព្រៃកប្បាស ខេត្តតាកែវអគារមណ្ឌលសុខភាពថ្មីនេះ គឺជាអំណោយរបស់ក្រុមការងារ​ចុះមូលដ្ឋានឃុំចារ នៃគណបក្សប្រជាជនកម្ពុជា ដឹកនាំដោយ ឯកឧត្តម តឹប អឿន មានបម្រើសេវា ដូចជា ពិគ្រោះជំងឺទូទៅ ផ្នែកសម្ពពស្រ្តី និងការចាក់វ៉ាក់សាំងការពារជំងឺជាដើម។

នៅក្នុងពិធីសម្ពោធ កាលពីព្រឹកថ្ងៃទី២៤ មិថុនានេះ ឯកឧត្តមបណ្ឌិត ពេជ សោភ័ន បានសម្តែងនូវការកោតសសើរ និងវាយតម្លៃខ្ពស់ចំពោះកិច្ចខិតខំប្រឹងប្រែង​របស់​ក្រុមការងារចុះ​ជួយមូលដ្ឋានឃុំចារទាំងអស់ ដែលបានខិតខំរួមគ្នាសម្រេចបាននូវសមិទ្ធិផលជាច្រើនហូហែរ ដូចជា ហេដ្ឋារចនាសម្ព័ន្ធផ្លូវថ្នល់, ការដាក់លូជូនប្រជាពលរដ្ឋ, មណ្ឌលសុខភាព, ផ្សារ និងសាងសង់អគារសិក្សា-ល-ដោយបានប្រែក្លាយឃុំនេះឲ្យមានការអភិវឌ្ឍរីកចម្រើនលើគ្រប់វិស័យ។ ជាមួយគ្នានេះ ឯកឧត្តម បានអរគុណចំពោះរដ្ឋបាលខេត្តតាកែវ រដ្ឋបាល​ស្រុកព្រៃកប្បាស អាជ្ញាធរមូលដ្ឋាន មន្ទីរ-អង្គភាពជំនាញពាក់ព័ន្ធ និងប្រជាពលរដ្ឋទាំងមូល ដែលបានរួមគ្នាក្នុងការជំរុញការអភិវឌ្ឍលើគ្រប់វិស័យ រួមគ្នាថែរក្សាបាននូវសុខសន្តិភាព ដែលជាមូលដ្ឋានគ្រឹះសម្រាប់ការអភិវឌ្ឍ។

តាមរយៈរបាយការណ៍របស់លោក ចាន់ ម៉ុន មេឃុំចារ និងការលើកឡើងរបស់ ឯកត្តម អ៊ូច ភា អភិបាលនៃគណៈអភិបាលខេត្តតាកែវ បានបញ្ជាក់ថា ការរីកសុះសាយនៃសមិទ្ធផល​លើគ្រប់វិស័យនៅទូទាំងឃុំ និងទូទាំងខេត្តតាកែវ រួមមានផ្លូវថ្នល់ ប្រព័ន្ធធារាសាស្រ្ត មណ្ឌលសុខភាព សាលារៀន វត្តអារាម និងការអភិវឌ្ឍគ្រប់វិស័យទាំងនេះ គឺបានមកពីការ​ខិតខំប្រឹងប្រែងរបស់គណបក្សប្រជាជនកម្ពុជា ដែលមានសម្តេចតេជោ ហ៊ុន សែន ជាប្រធានគណបក្ស និងជាថ្នាក់ដឹកនាំប្រទេសដ៏ឆ្នើមដែលតែងតែគិតគូរសុខទុក្ខ និងការរស់នៅរបស់ប្រជាពលរដ្ឋគ្រប់កាលៈទេសៈ និងគ្រប់ពេលវេលា។

សូមបញ្ជាក់ថា មុនបញ្ចប់កម្មវិធីនាឱកាសនោះ ឯកឧត្តមបណ្ឌិត ពេជ សោភ័ន បានអំពាវនាវឲ្យប្រជាពលរដ្ឋទាំងអស់ ចូលរួមបោះឆ្នោតគាំទ្រគណបក្សប្រជាជនកម្ពុជា ដែលនឹងប្រព្រឹត្តទៅ​នៅថ្ងៃទី២៣ ខែកក្កដា ឆ្នាំ២០២៣ខាងមុខនេះ ដើម្បីចូលរួមជួយថែរក្សាសន្តិភាព និងការអភិវឌ្ឍប្រទេសជាតិកាន់តែរីកចម្រើនរុងរឿងថែមទៀត៕​ដោយ ៖ បូរ៉ាវី