ភ្នំពេញ៖ ឯកឧត្តមបណ្ឌិត សូ ណារ៉ូ រដ្ឋមន្ត្រីប្រតិភូអមនាយករដ្ឋមន្ត្រី បានថ្លែងថា បក្សប្រឆាំងតែងតែប្រើប្រាស់នូវមនោគមវិជ្ជាចំនួន ៣ធំៗ ដើម្បីញុះញង់ទៅកាន់អ្នកគាំទ្ររបស់ខ្លួន ឲ្យមានការស្អប់ គុំគួនលើរាជរដ្ឋាភិបាលកម្ពុជា ដែលដឹកនាំដោយគណបក្សប្រជាជនកម្ពុជា ។

 ក្នុងសន្និសីទសារព័ត៌មាន នៅរសៀលថ្ងៃទី២៤ ខែមិថុនា ឆ្នាំ២០២៣ ឯកឧត្តមបណ្ឌិត បានលើកឡើងថា គណបក្សប្រឆាំងកំពុងក្លាយខ្លួនជាក្រុមជ្រុលនិយម ជេរប្រមាថនិយម បែកបាក់ លាបពណ៌យ៉ាងអនាធិបតេយ្យបំផុត ដែលនយោបាយនេះ គឺជានយោបាយធ្វើអត្តឃាតខ្លួនឯង ។

 ឯកឧត្តមបានបន្តថា មួយវិញទៀត គណបក្សប្រឆាំង ដែលមានទណ្ឌិត សម រង្ស៊ី នៅពីក្រោយខ្នង គឺតែងប្រើប្រាស់នូវមនោគមវិជ្ជាចំនួន ៣ធំៗ ទី១. ញុះញង់ឲ្យចង់គំហឹង​លើរាជរដ្ឋាភិបាលកម្ពុជា, ទី២. បង្កើតភាពសម្អប់លើអាជ្ញាធរ និងទី៣. បដិសេធការពិត នូវរាល់សមិទ្ធផលនានារបស់រាជរដ្ឋាភិបាល ដែលធ្វើឡើងដើម្បីបម្រើដល់ផលប្រយោជន៍ជាតិ ។

ឯកឧត្តម សូ ណារ៉ូ បានបន្ថែមថា មួយវិញទៀតទណ្ឌិត សម រង្ស៊ី គឺកំពុងហ៊ុព័ទ្ធដោយបទឧក្រិដ្ឋនានា ព្រោះបុគ្គលម្នាក់នេះ បានជេរប្រមាថព្រះមហាក្សត្រ រួមទាំងការអំពាវនាវដល់កងកម្លាំង បែរនូវចុងកាណុងប្រឆាំងនឹងសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ខណៈដែលទង្វើរនេះ បើកើតឡើងនៅសហរដ្ឋអាមេរិក មិនចាំបាច់អំពាវនាវបែរកាណុងទៅ​កាន់ប្រធានាធិបតី​នោះទេ គឺសូម្បីពលរដ្ឋធម្មតា ក៏ត្រូវបានចាត់វិធានការតាមច្បាប់ផងដែរ ។

ជាមួយនេះ ឯកឧត្តមបណ្ឌិត ក៏បានអំពាវនាវដល់អ្នកគាំទ្រគណបក្សប្រឆាំង សូមគិតគូរឲ្យបានវែងឆ្ងាយ កុំបន្តចាញ់បោកក្រុមប្រឆាំងរត់ចោលស្រុក និងស្ដាប់តាមការញុះញង់របស់ពួកគេ បង្កនូវបទល្មើសផ្សេងៗ ដែលនាំឲ្យកើតមាននូវទោសទណ្ឌ ខណៈពួកគេកំពុងរស់នៅយ៉ាងសុខស្រួល ៕ អត្ថបទ បាន សុខរិទ្ធិ