​បាល់ទាត់៖ ​អ្នកគាំទ្រ​ក្រុម​បាល់ទាត់ Ajax Amsterdam មិន​ដែល​បាន​ចូល​ទស្សនា​ការ​ប្រកួត​មួយ​ប្រកួត​ណា​ឡើយ ​របស់​ក្រុម​នៅ​រដូវ​កាល​នេះ​ដោយសារតែ​ជំងឺ​រាតត្បាត Covid-19 ដូច្នេះ​ក្លិប​បាន​សំរេច​ចិត្ត​ធ្វើ​រឿង​គួរ​អោយ​ស្ញប់ស្ញែង​។

​​ដើម្បី​តបស្នង និង​ជា​កា​ដឹងគុណ​ទៅដល់​អ្នកគាំទ្រ​ ដែល​នឹក​រលឹក​ចង់​ទស្សនា​ផ្ទាល់​នូវ​សកម្មភាព​បាល់ទាត់ Ajax Amsterdam ដែល​ជា​ជើងឯក​លី​គ​កំពូល​ហូ​ឡង់ Eredivisie​ រដូវ​កាល​នេះ​ ក៏បាន​សំរេច​រំលាយ​ពាន​ជើងឯក​ធ្វើ​ពី​ប្រាក់​របស់​ខ្លួន​ ទៅជា​រូប​ផ្កាយ​ប្រាក់​តូច​ៗ​ចំនួន ៤២០០០​គ្រាប់​ចែក​ជួន​អ្នក​គាំទ្រ​ ដែល​បាន​ជាវ​សំបុត្រ​ចូល​ទស្សនា​កាល​ពី​ដើម​រដូវ​កាល​នៅ​កីឡដ្ឋាន Johan Cruyff Arena​។ ​នាយក​ប្រតិបត្តិ​ក្លិប​លោក Edwin van der Sar​ បាន​ឲ្យ​ដឹង​ថា រដូវ​កាល​កន្លង​មក​នេះ Ajax លេង​ក្នុង​កីឡដ្ឋាន​ដោយ​គ្មាន​អ្នក​គាំទ្រ​ តាំងពី​ដើម​រដូវ​កាល​រហូត​មក​ដល់​ពេល​នេះ តែ​អ្នកគាំទ្រ​នៅតែ​ជា​ផ្នែក​ដ៏​សំខាន់​របស់​ក្លិប​ តាមរយៈ​ការ​គាំទ្រ​នៅ​តាម​បណ្តាញ​សង្គម តាម​ផ្លូវ​នៅ​ខាងក្រៅ​កីឡដ្ឋាន​ជាដើម​។

​​មិន​មាន​អ្វី​ច្រើន​ទេ នេះ​ជា​ការ​តបស្នង​បន្តិចបន្តួច​របស់​ក្លិប​ទៅកាន់​អ្នកគាំទ្រ ​អតីត​អ្នក​ចាំទី Manchester United រូប​នេះ​បន្ថែម​។ ​​សូម​បញ្ជាក់​ថា ​លី​គ​កំពូល​ហូ​ឡង់​នៅសល់ ២​ប្រកួត​ទៀត​ទើប​ចប់​រដូវ​កាល​តែ Ajax ធានា​បាន​ជើង​ឯក​តាំង​ពី​ដើម​ខែ ក្រោយ​ដាច់​ពិន្ទុ​ក្រុម​លេខ​២ PSV Eindhoven ដល់​ទៅ ១៤​ពិន្ទុ​។ ​គិត​មក​ដល់​ពេល​នេះ​លី​គ​កំពូល​ហូ​ឡង់​មានតែ Ajax ទេ​ដែល​ឈ្នះ​ជើងឯក​ច្រើន​ជាងគេ​សរុប ៣៥​លើក​ ខណៈ PSV Eindhoven ឈ្នះ ២៤​លើក​៕

​អត្ថបទ​៖​នាង សុភា​វុ​ធ