អ្នកក្រុងបាសេឡូណា (Barcelona) បានព្យាយាមធ្វើឲ្យខ្លួនត្រជាក់កាលពីថ្ងៃសៅរ៍ ទី២៤មិថុនា នៅឆ្នេរសមុទ្រ ខណៈប្រទេសនេះ ជិតជួបប្រទះរលកកម្ដៅនៃរដូវក្ដៅលើកដំបូង ដែលសីតុណ្ហភាពបានហកើឡើងដល់៤០អង្សារសេ។ 

ទីភ្នាក់ងារអាកាសធាតុអេស្ប៉ាញ AEMET រំពឹងថា អេស្ប៉ាញនឹងជួបប្រទះ រលកកម្ដៅចាប់ពីថ្ងៃ អាទិត្យទី២៥ខែមិថុនា ដល់ថ្ងៃពុធទី២៨ខែមិថុនាសប្ដាហ៍ក្រោយ។ 

តំបន់មួយចំនួននៅ ភាគខាងត្បូង ប្រទេសនេះ សីតុណ្ហភាពបានហក់ឡើងដល់៤០អង្សារសេ ខណៈដែលសីតុណ្ហភាពនៅទីក្រុងបាសេឡូណា បានឡើងដល់៣០អង្សារសេ ដែលជំរុញឲ្យអ្នកស្រុកនិងភ្ញៀវទេសចរណ៍សម្រុកទៅកាន់ឆ្នេរសមុទ្រ បាសេឡូណេតា (Barceloneta) ។

រដូវស្លឹកឈើលាស់នៅឆ្នាំនេះ ក្ដៅបំផុត និងហួតហែងបំផុតលើកទី២នៅក្នុងប្រទេសអេស្ប៉ាញ ចាប់តាំងពីបានចាប់ផ្ដើមកត់ត្រាកាលពីឆ្នាំ១៩៦១ ដោយសីតុណ្ហភាពខ្ពស់ជាងកម្រិតមធ្យមនេះ ទំនងជាអាចបន្តដល់រដូវក្ដៅទៀតផង ៕