ភ្នំពេញ៖ ប្រជាពលរដ្ឋរស់នៅក្នុងឃុំចារ ស្រុកព្រៃកប្បាស ខេត្តតាកែវ បានប្រាប់ឲ្យដឹងថា ពួកគាត់នឹងបោះឆ្នោតគាំទ្រជូនគណបក្សប្រជាជនកម្ពុជាបន្តទៅមុខទៀត ដើម្បីរក្សាសន្តិភាព និងការអភិវឌ្ឍប្រទេសជាតិឲ្យកាន់តែរីកចម្រើនបន្ថែមទៀត។

ក្នុងឱកាសចូលរួមពិធីសម្ពោធដាក់ឲ្យប្រើប្រាស់ជាផ្លូវការអគារមណ្ឌលសុខភាពចារ នៅភូមិអង្គស្វាយចេក ឃុំចារ ស្រុកព្រៃកប្បាស ខេត្តតាកែវ កាលពីព្រឹកថ្ងៃទី២៤ ខែមិថុនា ឆ្នាំ២០២៣នេះ ប្រជាពលរដ្ឋ លើកឡើងថា មូលហេតុនៅតែគាំទ្រ និងជឿជាក់គណបក្ស​ប្រជាជនកម្ពុជា ដោយសារគណបក្សមួយនេះ បានដឹកនាំប្រទេសមានសុខសន្តិភាព និងមានការអភិវឌ្ឍលើគ្រប់វិស័យ ​ជាពិសេសគោលនយោបាយដ៏ត្រឹមត្រូវ ​ដែលនាំឲ្យការរស់នៅ មានភាព​សម្បូរសប្បាយ ​និងមានសេរីភាពពេញលេញ។

ពួកគាត់ បានអំពាវនាវឲ្យប្រជាពលរដ្ឋទាំងអស់ ចូលរួមបោះឆ្នោតកុំបីខាន នាខែកក្កដាខាងមុខ ដើម្បីឲ្យគណបក្សប្រជាជនកម្ពុជាបានបន្តដឹកនាំប្រទេសជាតិកាន់តែរីកចម្រើន ពិសេសទទួលបានសុខសន្តិភាពតកូនតចៅ។

ក្នុងឱកាសនោះ ឯកឧត្តមបណ្ឌិត ពេជ សោភ័ន រដ្ឋមន្រ្តីប្រតិភូអមនាយករដ្ឋមន្រ្តី រដ្ឋលេខាធិការ​ប្រចាំការ ក្រសួងការងារ និងបណ្តុះបណ្តាលវីជ្ជាជីវៈ និងជាសហប្រធាន​ក្រុមការងាររាជរដ្ឋាភិបាល​ចុះមូលដ្ឋាន​ស្រុកព្រៃកប្បាស ខេត្តតាកែវ បានណែនាំឲ្យក្រុមការងារមូលដ្ឋានគ្រប់ជាន់ថ្នាក់ បន្តចុះ​សួរសុខទុក្ខ ជួយឧបត្ថម្ភគាំទ្រ និងដោះស្រាយសំណូមពរ ​ក៏ដូចជាទុក្ខលំបាករបស់ប្រជាពលរដ្ឋ ហើយផ្ដល់អាហារូបករណ៍ដល់កូនចៅប្រជាពលរដ្ឋបានទទួលការសិក្សាលើមុខជំនាញវិជ្ជាជីវៈ ដើម្បីមាន​ជំនាញច្បាស់លាស់សម្រាប់រកការងារធ្វើ ឬប្រកបមុខរបរចិញ្ចឹមជីវិត ជួយជីវភាពក្រុមគ្រួសារឲ្យកាន់តែប្រសើរ។

ឯកឧត្តមបណ្ឌិត បានកោតសសើរ និងអរគុណចំពោះរដ្ឋបាលខេត្តតាកែវ រដ្ឋបាលស្រុកព្រៃកប្បាស អាជ្ញាធរមូលដ្ឋាន មន្ទីរ-អង្គភាពជំនាញពាក់ព័ន្ធ ​លោកគ្រូ អ្នកគ្រូ និងប្រជាពលរដ្ឋ ដែលបានរួមគ្នា​ក្នុងការជំរុញការអភិវឌ្ឍលើគ្រប់វិស័យ រួមគ្នាថែរក្សាបាននូវសុខសន្តិភាព ដែលជាមូលដ្ឋាន​គ្រឹះសម្រាប់ការអភិវឌ្ឍ។

សូមជម្រាបជូនថា ការបោះឆ្នោតជ្រើសតាំងតំណាងរាស្រ្តនីតិកាលទី៧ នឹងប្រព្រឹត្តទៅថ្ងៃទី២៣ ខែកក្កដា ឆ្នាំ២០២៣នេះខាងមុខនេះ៕