ភ្នំពេញ៖ អគ្គនាយកដ្ឋានអប់រំបណ្តុះបណ្តាលបចេ្ចកទេស និងវិជ្ជាជីវៈ នៃក្រសួងការងារ និងបណ្តុះបណ្តាលវិជ្ជាជីវៈ នៅព្រឹកថ្ងៃទី២៦ មិថុនា ឆ្នាំ២០២៣នេះ បានរៀបចំពិធីប្រកាសដាក់ឱ្យដំណើរការជាផ្លូវការនូវប្រព័ន្ធជាតិវាយតម្លៃទទួលស្គាល់

ការសិក្សាពីមុនពីចម្ងាយ សម្រាប់ការវាយតម្លៃផ្អែកលើសមត្ថភាព និងផ្តល់គុណវុឌ្ឍិជាតិកម្ពុជា (National E-RPL Platform) ដើម្បីបង្កភាពងាយស្រួលទៅលើប្រព័ន្ធដែលមានស្រាប់ តាមរយៈការពង្រីកដំណើរការវាយតម្លៃឱ្យកាន់តែកៀកទៅនឹងកម្មករ និងពលករដែលមានជំនាញ។

ពិធីនេះ បានប្រារព្ធធ្វើឡើងនៅរាជធានីភ្នំពេញ ក្រោមវត្តមានរបស់ឯកឧត្តម ឡៅ ហ៊ីម រដ្ឋលេខាធិការប្រចាំការ ក្រសួងការងារ និងបណ្តុះបណ្តាលវិជ្ជាជីវៈ និងលោកស្រី GWYNETH WONG នាយិកាប្រចាំប្រទេស អង្គការភ្លែនអន្តរជាតិកម្ពុជា និងមានការអញ្ញើញចូលរួម​ពី​មន្រ្តីថ្នាក់​ដឹកនាំ និងមន្រ្តីរាជការក្រសួងការងារ និងភ្ញៀវកិត្តិសជាតិ និងអន្តរជាតិសរុបប្រមាណ ៨០នាក់។

សូមបញ្ជាក់ថា ប្រព័ន្ធជាតិវាយតម្លៃទទួលស្គាល់ការសិក្សាពីមុនពីចម្ងាយ សម្រាប់ការវាយតម្លៃផ្អែក​លើសមត្ថភាព​ និងផ្តល់គុណវុឌ្ឍិជាតិកម្ពុជានេះមានគោលបំណងជួយដល់សិស្សានុសិស្ស និស្សិត កម្មករ និងពលករដែលទទួលបានជំនាញពីការអប់រំបណ្តុះបណ្តាលក្រៅប្រព័ន្ធ និងមិនផ្លូវការ អាចមានឱកាសមកទទួលការវាយតម្លៃសមត្ថភាពផ្ទាល់ខ្លួន ដើម្បីទទួលបានវិញ្ញាបនបត្រ​គុណវុឌ្ឍិជាតិ ឬវិញ្ញាបនបត្រសមត្ថភាព ​ឬលិខិតបញ្ជាក់សមត្ថភាព ដែលអាចយកទៅប្រើប្រាស់​ក្នុងការស្វែងរកការងារ បង្កើនប្រាក់បៀវត្ស និងជាពិសេសអាចបន្តការអប់រំបណ្តុះបណ្តាលកម្រិត​ខ្ពស់​បន្តបន្ទាប់នៅតាមគ្រឹះស្ថានអប់រំបណ្តុះបណ្តាលបច្ចេកទេស​ និងវិជ្ជាជីវៈសាធារណៈ ឯកជន សមាគម-អង្គការមិនមែនរដ្ឋាភិបាល ដែលនេះជាការចូលរួមចំណែកក្នុងដំណើរការសិក្សា​ពេញមួយ​ជីវិត សម្រាប់ប្រជាពលរដ្ឋកម្ពុជា៕