ភ្នំពេញ៖ គិតចាប់ពីថ្ងៃទី ២៥ ខែមិថុនា ឆ្នាំ២០២០ មកដល់ថ្ងៃទី២៤ ខែមិថុនា ឆ្នាំ២០២៣នេះ រាជរដ្ឋាភិបាលបានឧបត្ថម្ភសាច់ប្រាក់ជូនគ្រួសារក្រីក្រ ​និងងាយរងគ្រោះក្នុង អំឡុងពេល​ប្រយុទ្ធនឹងជំងឺកូវីដ-១៩ ដល់ពលរដ្ឋជាង ៧០ម៉ឺនគ្រួសារ ចំនួន៣៦លើក ដោយចំ​ណាយ​ថវិកា​រដ្ឋអស់ជាង ៤ ពាន់ប៊ីលានរៀល ឬស្នើនឹងប្រមាណជាង ១០៨៨ លានដុល្លារ។

យោងតាមសេចក្តីជូនដំណឹងរបស់ក្រសួងសង្គមកិច្ច ​អតីតយុទ្ធជន ​និងយុវនីតិសម្បទា ស្តីពី​លទ្ធផល​នៃការអនុវត្តកម្មវិធី​ឧបត្ថម្ភ​សាច់ប្រាក់ជូនគ្រួសារក្រីក្រ​ និងងាយរងគ្រោះក្នុង អំឡុងពេល​ប្រយុទ្ធនឹងជំងឺកូវីដ-១៩ ​សម្រាប់ជុំទី១៣ លើកទី២​ និងការបើកសាច់ប្រាក់ ​ជុំទី១៣ លើកទី៣ បានឱ្យដឹងថា គិតចាប់ពីថ្ងៃទី២៤ ខែមិថុនា ឆ្នាំ២០២០ ដល់ថ្ងៃទី២៤ ​ខែមិថុនា ឆ្នាំ២០២៣នេះ ការបើកផ្ដល់ប្រាក់ឧបត្ថម្ភជុំទី១៣ លើកទី២ត្រូវបានបញ្ចប់ ​និងចាប់ផ្ដើមបន្តអនុវត្តការបើក​ផ្ដល់​សាច់ប្រាក់ជុំទី១៣លើកទី៣ដល់ប្រជាពលរដ្ឋជាង ៧០ ​ម៉ឺនគ្រួសារបន្តទៀត។

សូមជម្រាបថា កាលពីថ្ងៃទី២៤ ខែមិថុនា ឆ្នាំ២០២០ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា ​បានប្រកាសដាក់ឱ្យអនុវត្តជាផ្លូវការនូវ កម្មវិធីឧបត្ថម្ភ​សាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ-១៩ ហើយក្រសួង​សង្គមកិច្ច អតីតយុទ្ធជន និងយុវនីតិសម្បទា ក៏បានចាប់ផ្ដើមដំណើរការអនុវត្តកម្មវិធីនេះ នៅ​ថ្ងៃទី២៥ ខែមិថុនា ឆ្នាំ២០២០ ​មកដល់បច្ចុប្បន្នបានចំនួន ​១៣ ជុំ មាន ៣៦ លើករួចមកហើយ ដោយ​ចំណាយថវិការដ្ឋអស់ជាង ៤ ពាន់ប៊ីលានរៀល ​ឬស្នើនឹងប្រមាណជាង ១០៨៨ លានដុល្លារ៕អត្ថបទ៖ វ៉ន ដារ៉ា