កាណាដា ៖ លោក Justin Trudeau នាយករដ្ឋមន្រ្តីនៃប្រទេសអាណាណាបានធ្វើដំណើរទៅកាន់ប្រទេស​អ៊ីស្លង់​កាល​ពី​ថ្ងៃអាទិត្យ (២៥ មិថុនា) ដើម្បីចូលរួមក្នុងកិច្ចប្រជុំរបស់បណ្ដានាយករដ្ឋមន្រ្តីនៃក្រុមប្រទេសឣឺរុបខាងជើង (Nordic) ក្នុងនាមជាភ្ញៀវពិសេស។

ដំណើរទស្សនកិច្ចរបស់លោក Trudeau ត្រូវបានកំណត់ដើម្បីពង្រឹងភាពជាដៃគូរបស់ប្រទេស​កាណាដាជាមួយ​បណ្តា​ប្រទេសឣឺរុបខាងជើង និងជួយដោះស្រាយបញ្ហាប្រឈមជាសកលដូចជាការការពារបរិស្ថាន ការបង្កើតការងារថ្នាក់​កណ្តាល ព្រមទាំងការអភិវឌ្ឍថាមពលស្អាត និងគួរឱ្យទុកចិត្ត។

នៅក្នុងជំនួបជាមួយលោកនាយករដ្ឋមន្ត្រីហ្វាំងឡង់ Petteri Orpo លោក Trudeau បាននិយាយថា លោកបា​ន​និយាយជា​​មួយ​ប្រធានាធិបតីអាមេរិកលោក Joe Biden និងប្រធានាធិបតីអ៊ុយក្រែនលោក Volodymyr Zelenskiy ដើម្បីពិភាក្សាអំពីស្ថានភាព​សន្តិសុខនៅក្នុងប្រទេសរុស្ស៊ីបន្ទាប់ពីមានការបះបោររយៈពេលខ្លី​ដោយក្រុមយុទ្ធជន​នៃក្រុមទាហានស៊ីឈ្នួល Wagner ។

លោក Trudeau បានសរសេរនៅលើបណ្ដាញសង្គម Twitter ថា "ប្រទេសកាណាដាប្តេជ្ញាឈរជាមួយអ៊ុយក្រែន និង​ផ្តល់ឱ្យអ៊ុយក្រែននូវការគាំទ្រតាមតម្រូវការ" ។

បណ្ដាមេដឹកនាំក្រុមប្រទេសឣឺរុបខាងជើងត្រូវបានគេរំពឹងថានឹងពិភាក្សាគ្នាកាលពីថ្ងៃអាទិត្យ និងថ្ងៃច័ន្ទ (២៦ មិថុនា)​នេះ ​អំពីបញ្ហាសកលនៅមុនកិច្ចប្រជុំកំពូលរបស់បណ្ដាមេដឹកនាំអង្គការណាតូនៅខែក្រោយនៅទីក្រុង Vilnius ប្រទេសលីទុយអានី៕