កណ្ដាល៖ បណ្តាសិស្សានុសិស្សកំពុងសិក្សារៀនសូត្រនៅតាមសាលាវិទ្យាល័យនានា ដែលទើបគ្រប់អាយុបោះឆ្នោត បានសម្រេចចិត្តនាំគ្នាថា នឹងទៅបោះឆ្នោត នៅក្នុងឱកាសបោះឆ្នោតជ្រើសតាំងតំណាងរាស្ត្រអាណត្តិទី៧ ថ្ងៃទី២៣ ខែកក្កដា ឆ្នាំ២០២៣ ខែក្រោយនេះ ដោយបានត្រៀមឯកសារបម្រើការបោះឆ្នោតរួចហើយ និងក៏មានគណបក្សដែលល្អនៅក្នុងចិត្តរបស់ខ្លួនហើយដែរ។

បណ្តាសិស្សានុសិស្សនៅក្រុងតាខ្មៅ ខេត្តកណ្តាល ថ្លែងប្រាប់BTV នៅថ្ងៃទី២៦ ខែមិថុនានេះ ថា រហូតមកដល់ពេលនេះ សិស្សដែលគ្រប់អាយុបោះឆ្នោត គឺបានធ្វើ​អត្តសញ្ញាណប័ណ្ណ​សញ្ជាតិខ្មែរ និង​បានចុះឈ្មោះបោះឆ្នោតរួចហើយ ហើយនៅក្នុងដំណើការទទួលបានសិទ្ធិបោះឆ្នោតជាលើក​ដំបូងរបស់គេ គឺគេបានត្រៀមខ្លួន និងបានសម្រេចចិត្តច្បាស់លាស់រួចរាល់ហើយដែរ ថានឹងទៅ​បោះឆ្នោត​ជូនគណបក្ស ​ដែលមានគុណបំណាច់ធំធេង ​បានរំដោះប្រទេសជាតិចេញ​របប​ប្រល័យប៉ុល ពត បានថែរក្សាសុខសន្តិភាព អភិវឌ្ឍន៍ប្រទេសជាតិរីកចំរើនលើគ្រប់វិស័យ ជាពិសេសវិស័យអប់រំ។

ដោយមានការណែនាំថ្នាក់ដឹកនាំក្រសួងអប់រំយុវជន​ និងកីឡា និងគណៈកម្មាធិការជាតិរៀបចំការ​បោះឆ្នោត គ.ជ.ប មកដល់ពេលនេះ​ បណ្តាថ្នាក់ដឹកនាំសាលា ​នៅកម្រិតវិទ្យាល័យ បានធ្វើការ​តាមដាន និងបានណែនាំសិស្សានុសិស្សអាយុចាប់ពី១៥ឆ្នាំឡើង​ត្រូវទៅ​ធ្វើអត្តសញ្ញាណបណ្ណ​សញ្ជាតិខ្មែរគំរូថ្មី ​ហើយសិស្សានុសិស្សមានអាយុចាប់ពី១៨ ឆ្នាំឡើងទៅគឺត្រូវបានណែនាំ​ឲ្យ​ចុះឈ្មោះបោះឆ្នោតផងដែរ ​ជាពិសេសសម្រាប់សិស្សសិក្សាថ្នាក់ទី១២ និងសិស្សមួយចំនួនសិក្សា​នៅថ្នាក់ទី១១ផងដែរ៕ អត្ថបទស៊ុម សុខជា